Ole Gunnar Solskjaer yatozaga rutahizamu Erling Haaland mu ikipe ya Molde yo muri Norway mbere y'uko yerekeza muri RB Salzburg na Borussia Dortmund yavuyemo yerekeza muri Manchester City.
Uyu musore yari kuba yarabaye rutahizamu wa Manchester United iyo iyi kipe yumvira Solskjaer wahoze ari rutahizamu wayo mbere y'uko aba umutoza wayo mu 2018.
Ole yatoje Haaland muri Molde
Ole Gunnar Solskjaer yatangaje ati:"Nahamagaye Manchester United amezi atandatu mbere y'uko mba umutoza wayo mbabwira ko nagakwiye kuzana rutahizamu twari dufite ariko ntibanyumvise.
"Nasabye miliyoni enye z'amapawundi kuri Haaland ariko ntibigeze bamusinyisha."
Byarangiye uyu musore yerekeje muri mukeba wayo Manchester City kuri miliyoni 51 z'amapawundi none kuri ubu niwe rutahizamu ubarwa nk'uhenze ku isi kuko abarirwa agaciro ka miliyoni 200 z'amapawundi.
Ole Gunnar Solskjaer ashinja Manchester United kutamwumvira
Manchester United ifite ikibazo gikomeye cya rutahizamu nimero ikenda n'ubwo muri uyu mwaka w'imikino Marcus Rashford yayitsindiye ibitego 29, ariko asatira izamu anyuze ibumoso. Ni mu gihe Antony Martial na Wout Weghorst batabashije gutanga umusaruro.
Ni mu gihe ku rundi ruhande Erling Haaland banze akomeje gukuraho uduhigo muri Manchester City, dore ko ubu amaze gutsinda ibitego 35 muri Premier League na 50 mu marushanwa yose.
Ole Gunnar Solskjaer yatoje Manchester United hagati ya 2018 na 2021 abasha kuyihesha umwanya wa kabiri muri Premier League, gusa ikijyanye n'ibikombe cyo nticyagenze neza.
Erling Haaland akomeje gushyiraho uduhigo
