Iri zamuka rikomeye ry’umutungo wa Musk ryatewe ahanini n’isosiyete ye ikora mu by’ikirere, SpaceX, iherutse gutangiza gahunda yo kugurisha imigabane yayo ku gaciro kageze kuri miliyari 800 z’amadolari, ivuye kuri miliyari 400 yari ifite muri Kanama uyu mwaka. Iri zamuka ry’agaciro ryatumye SpaceX iba imwe mu masosiyete yihariye afite agaciro kanini ku isi.
Elon Musk ufite hafi 42% by’imigabane ya SpaceX, ni we wagize inyungu nyinshi muri iri zamuka. Mu gihe gito, umutungo we wiyongereyeho miliyari 168 z’amadolari, ugera hafi kuri miliyari 677 z’amadolari kugeza ku wa Mbere ushize, bituma ashimangira umwanya wa mbere mu baherwe ku isi.
Kubera aya mateka mashya, Elon Musk abaye umuntu wa mbere mu mateka y’isi ugiye ku rwego rwo gutunga umutungo urenze miliyari 600 z’amadolari. Nk’uko Forbes ibitangaza, nta wundi muherwe n’umwe wari warigeze no kwegera miliyari 500 z’amadolari mbere y’ibi, bigaragaza uko uyu mushoramari akomeje gusiga amateka adasanzwe mu bukungu bw’isi.
Iyi ntambwe ikomeye igaragaza uruhare rukomeye rw’ikoranabuhanga n’ishoramari mu by’ikirere mu guhindura isura y’ubukungu bw’isi, aho Elon Musk akomeje kwiyandikwa mu mateka nk’umwe mu bantu bagize ingaruka zikomeye ku iterambere ry’isi ya none.
Elon Musk umubutunzi bwe bukomeje gutumbagira
