Nk'uko bigenda ahenshi mu kazi hari amafaranga umukozi ahabwa yishimwe yiyongera ku mushahara bitewe nuko yakoze neza. Ayo niyo yitwa Prime mu ndimi z'amahanga, cyangwa se agahimbazamusyi mu Kinyarwanda.
Nk'uko bimenyerewe henshi amakipe atanga agahimbazamusyi kuri buri mukino batsinze, ndetse aba ari amafaranga asanzwe azwi n'ubwo hari igihe habamo impinduka ku bw'impamvu runaka akenshi bitewe n'uburemere bw'umukino batsinze.
Aha hari urutonde rw'agahimbazamusyi amakipe 16 ari muri shampiyona y'ikiciro cya mbere mu Rwanda atanga kuri buri mukinnyi wayo iyo batsinze umukino, nk'uko inkuru dukesha ISIMBI ibivuga.
Uduhimbazamusyi tw’amakipe yo mu cyiciro cya mbere 2021-22
Police FC 60,000 Frw
AS Kigali 60,000 Frw
APR FC 50,000 Frw
Musanze FC 40,000 Frw
Kiyovu Sports 30,000 Frw
Espoir FC 30,000 Frw
Gasogi United 30,000 Frw
Etoile del’Est 30,000 Frw
Gorilla FC 30,000 Frw
Rayon Sports 25,000 Frw
Bugesera FC 25,000 Frw
Rutsiro FC 25,000 Frw
Mukura VS 20,000 Frw
Etincelles FC 20,000 Frwa
Marines FC 20,000 FRW
Gicumbi FC 20,000 Frw
Ikipe ya AS Kigali na Police FC zisanzwe ziri mu makipe bizwi ko nta kibazo cy'ubukungu ajya agira n'ubwo gutwara ibikombe byo biba byazihishe, nizo ziyoboye mu gutanga agahimbazamusyi biri hejuru dore ko ari n'amakipe ahemba neza.
Ku ruhande rwa APR FC yo agahimbazamusyi ni ibihumbi 50 ariko uko igenda itsinda imikino ikurikirana hiyongeraho ibihumbi 25, yanganya cyangwa yatsindwa bakongera guhera ku bihumbi 50 byagenwe.
N'ubwo kuri Kiyovu Sports havugwa ibihumbi ariko amakuru avuga ko impamvu aruko nta mukinnyi uhabwa agahimbazamusyi kari munsi yayo. Ariko hari abakinnyi bumvikana ingano y'agahimbazamusyi ukwabo mu masezerano yabo akaba atandukanye n'abandi muri iyi kipe.
Rayon Sports yo n'ubwo ifite abafana benshi ariko iri mu makipe atanga agahimbazamusyi kari hasi, aho itanga ibihumbi 25. Gusa aya hari igihe yiyongeraho ay'abafana bitewe n'ibyo bifuza ko byava mu mikino ikomeye baba bagiye gukina.
Muri rusange ayo ni amafaranga aba yarashyizweho mu makipe nk'agahimbazamusyi, ariko aya mafaranga hari igihe ahinduka cyane cyane ku mikino ikomeye ubuyobozi buba bwifuza gutsinda cyane bigatuma bongera agahimbazamusyi baba na ngombwa bagakuba.
