Uwahoze ari umukunzi wa Antony Matheus dos Santos yashinje uyu munya-Brazil kumuhohotera igihe bari bakiri mu rukundo.
Inkuru dukesha ikinyamakuru Globo Esporte ivuga ko Gabriela Cavallin wahoze akundana na Antony, yamaze kugeza ikirego cyo mu mujyi wa Sao Paulo ashinja uyu mukinnyi wa Manchester United kuba yaramuhohoteye akanamukomeretsa.
Si iki kinyamakuru cyo muri America y'epfo gusa kuko n'ikinyamakuru ESPN cyemeje aya makuru. Bivugwa ko ikirego cyaherekejwe n'amafoto y'ibikomere n'ubutumwa bumutera ubwoba yagiye yohererezwa na Antony.
Cavallin washinje Antony kumuhohotera
Amakuru ahari avuga ko Cavallin w'imyaka 22 yahohotewe na Antony tariki 20 Gicurasi 2023, ari nawo munsi yagaragaye mu mukino Manchester United yatsinzemo Bournwmouth 1-0 mu mukino wa Premier League.
Muri Kamena 2022, Gabriela Cavallin usanzwe ari n'umuvanzi w'imiziki(DJ), yatangaje ko yakuyemo inda(ku bw'impanuka) ubwo we na Antony biteguraga kwibaruka.
Bizwi ko Antony yashyingiranwe na Rosilenny Baptista ubwo yerekezaga muri Manchester United mu mpeshyi ya 2022, aguzwe miliyoni 85 z'amapawundi. Antony na Baptista bafitanye umwana w'umuhungu.
Muri Mutarama 2022 nibwo Mason Greenwood nawe ukinira Manchester United yatawe muri yombi ubwo yashinjwaga na Harriet Robson wari umukunzi we kumuhohotera.
Nyuma yo kumara igihe kinini akorwaho iperereza ndetse akaza no kuburana, muri Mutarama 2023 nibwo ubushinjacyaha bwamukuyeho ibyo birego yaregwaga ndetse bikavugwa ko uwari umukunzi we yabigiyemo kuko banasubiranye.
Antony ashobora kumera nka Mason Greenwood(Net-photo)
