Imikino itatu ibanza ya kimwe cya kane cy'Igikombe cy'amahoro yakinwe kuri uyu wa Gatatu, mu gihe undi umwe hataramenyekana ikipe izahura na Police FC hagati ya Rayon Sports na Intare FC zitarisobanura.
Umukino wa mbere wahuje APR FC na Marine FC. Nk'uko bisanzwe bimenyerewe ko ikipe ya Marine FC itajya yoroherwa na APR FC, n'uyu munsi ntabwo ibyavuye mu mukino ntabwo byatandukanye n'ibyari byitezwe.
Bizimana Yannick yafunguye amazamu ku munota wa munani, ku munota wa 32 Mugisha Gilbert ashyiramo igitego cya kabiri ku ruhande rwa APR FC. Ku munota wa 38 nibwo Usabimana yatsindiye Marine FC igitego kimwe biba ibitego 2-1, ari nako uyu mukino warangiye.
Ku rundi ruhande ikipe ya Kiyovu Sports yari yasuye ikipe ya Rwamagana City, ni umukino utari woroshye dore ko wagaragayemo ibitego bitanu uteranyije ku mpande zombi.
Ikipe ya Rwamagana City yafunguye amazamu ku munota wa kabiri gitsinzwe na Mbanza Caleb, Kiyovu Sports ikishyura ku munota wa 15 gitsinzwe na Riyad Nordien. Rwamagana yongeye gutsinda igitego cya kabiri gitsinzwe na Romeo ku munota wa 32, igice cya mbere kirangira Rwamagana City iyoboye.
Riyad Nordien yongera gutsindira Kiyovu ku munota wa 76, amakipe yombi yongera kunganya ibitego 2-2. Rwamagana City yasoje uyu mukino iwutsinze kubera igitego cya Gatatu yatsinze ku munota wa 85 gitsinzwe na Kagabo Nicholas.
Undi mukino wabaye kuri uyu munsi wabereye i Huye aho Mukura Victory sports yari yakiriye Musanze FC, ukaba warangiye Mukura ariyo icyuye intsinzi kubera igitego Kayumba Soter yatsinze ku munota wa 45.
APR FC yatsinze Marine mu mukino ubanza
