Ikipe ya Manchester United izerekeza amaso kuri Neymar Jr mu gihe yaba iguzwe n'abanya-Qatar bayobowe na Sheikh Jassim bin Hamad al Thani bamaze iminsi bagaragaza ko bifuza iyi kipe ku buryo bukomeye cyane.
Sheikh Jassim bin Hamad Al Thani na Si Jim Ratcliffe nibo babiri bahataniye kugira ikipe ya Manchester United yifuzwamo miliyari esheshatu z'amapawundi.
Inkuru dukesha ikinyamakuru The sun ivuga ko mu gihe Sheikh Jassim yaba abashije kwegukana Manchester United, icya mbere azakora ni gusinyisha umunya-Brazil Neymar Jr ukinira PSG.
Neymar ashobora gusohoka muri PSG(Image:Reuters)
Neymar Jr yatsinze ibitego 18 mu mikino 29 yakinnye muri uyu mwaka w'imikino, ariko yagize ikibazo cy'imvune y'akagombambari yatumye atari gukina kuri ubu.
Uyu munya-Brazil ni umwe mu bakinnyi bahembwa amafaranga menshi muri PSG ndetse no mu Burayi bwose muri rusange aho ahembwa ibihumbi 616 by'amapawundi ku cyumweru, bikaba ari bimwe mu bishobora gutuma iyi kipe imurekura.
Sheikh Jassim yifuza Neymar nyuma yo kugura Manchester United(Net-photo)
Neymar Jr aracyari umukinnyi ufite agahigo ko kugurwa amafaranga menshi ku isi aho yaguzwe miliyoni 198 z'amapawundi mu 2017 ubwo yavaga muri FC Barcelona yerekeza muri PSG, akaba agifite amasezerano azasoza mu 2025 ariko ashobora kongerwa akageza mu 2027.
Kuba hari ibitekerezo bya Neymar Jr, ntabwo bikuraho kuba ikipe ya Manchester United yifuza rutahizamu Harry Kane mu bakinnyi ishobora gusinyisha mu mpeshyi ya 2023.
Gusa n'ubwo bimeze gutya, hari andi makuru avuga ko abanyamerica bafite Manchester United bateganya kuba bareka ibyo kuyigurisha bakayigumana indi myaka.
Abaherwa ba Manchester United bashobora kwisubira ntibayigurishe(Net-photo)
