"Mvuga igihe nshaka kuvuga"-Cristiano yasubije abamunenga ku gihe yavugiye ibibazo bye na Manchester United

"Mvuga igihe nshaka kuvuga"-Cristiano yasubije abamunenga ku gihe yavugiye ibibazo bye na Manchester United

 Nov 21, 2022 - 13:39

Bwa mbere Cristiano Ronaldo yagize icyo avuga nyuma y'ikiganiro yagiranye na Piers Morgan cyateje uruntu runtu mu bakunzi ba ruhago ku isi.

Rutahizamu Cristiano Ronaldo avuga ko atita ku kuntu abantu bamutekereza, akaba abivuga nyuma yo kurikoroza mu bakunzi ba ruhago bitewe n'ikiganiro aherutse kugirana n'umunyamakuru Piers Morgan.

Amakuru ava i Manchester avuga ko Manchester United ikomeje kureba uburyo yatandukana n'uyu munya-Portugal nyuma yo kwandagaza iyi kipe, ndetse akavuga ko atanubaha umutoza we Erik Ten Hag kuko avuga ko nawe atamwubaha.

Kuva icyo gihe Cristiano Ronaldo yagiye anengwa cyane na benshi bavuga ko atari akwiye kuvuga amagambo nk'ariya ku bakoresha be, abandi bakitsa cyane mu kuvuga ko babivuze mu gihe kitari cyo.

Mu gitondo cyo kuri uyu wa Mbere nibwo Cristiano Ronaldo yagize icyo avuga kuri ibyo, mu gihe yari mu kiganiro n'itangazamakuru bitegura umukino wa mbere Portugal izakina ku wa Kane.

Cristiano yavuze ati:"Igihe gihora ari igihe. Mu ruhande rwanyu biroroshye kureba uko twahitamo igihe kiza. Hari igihe wandika ukuri, hari n'igihe wandika ibinyoma. Simfite ubwoba bw'ibyo abandi batekereza. Mvuga iyo nshaka kuvuga. Buri wese azi uwo ndiwe, ndetse n'icyo nizera."

Kuri ubu ibitekerezo bya Cristiano Ronaldo aho intego ari kucyegukana dore ko bigaragara ko aricyo gikombe cy'isi cya nyuma agiye gukina, mbere y'uko asubira guhangana n'ibobazo bye muri Manchester United.

Kuri uyu wa Mbere kandi Ronaldo yaciye akandi gahigo ko kuba umuntu wa mbere ukurikirwa n'abantu benshi ku rubuga rwa Instagram, aho uyu mugabo yamaze kuzuza abantu miliyoni 500 zimukurikira.

Usibye konti ya Instagram ubwayo ikurikirwa n'abantu miliyoni 569, ntawundi muntu ku isi ukurikirwa kuri Instagram kurusha Cristiano Ronaldo.

Ikipe y'igihugu ya Portugal izakina umukino wa mbere mu gikombe cy'isi ku wa Kane saa 18:00 aho izakina na Ghana bari kumwe mu itsinda H, rikaba ari itsinda rinarimo Uruguay na Koreya y'epfo.

Cristiano Ronaldo yerekeje umutima ku gikombe cy'isi