Rutahizamu Lionel Messi ukomoka muri Argentine akomeje kuvugwa mu ikipe ya FC Barcelona ashobora kwerekezamo mu mpeshyi mu gihe yaba atandukanye na Paris Saint-Germain asoje amasezerano ye.
Mu mukino wo kwishyura muri kimwe cya kabiri cya Copa del Rey wabaye kuri uyu wa Gatatu wahuje FC Barcelona na Real Madrid, abafana ba FC Barcelona bageze ku munota wa cumi baririmba izina "Messi".
Mu mikino 778 Messi yakiniye FC Barcelona, uyu rutahizamu yabashije kuyitsindira ibitego 672 mu myaka 13 yayimazemo dore ko yahageze akiri umwana muto.
Abafana ba FC Barcelona baririmbye Messi nyuma y'uko ku Cyumweru abafana ba Paris Saint-Germain bavugirije induru uyu mugabo, nyuma y'uko batishimiye uko ari kwitwara mu ikipe yabo.
Mu gihe bikomeje kuvugwa ko Lionel Messi azasohoka muri Paris Saint-Germain ubwo uyu mwaka w'imikino uzaba urangiye, FC Barcelona iza imbere mu makipe ahabwa amahirwe ashobora kwerekezamo.
Ikipe ya Al Hilal yo muri Saudi Arabia nayo ni andi mahitamo uyu munya-Argentine afite gutekerezaho, dore ko iyi kipe yiteguye kujya imuhemba miliyoni 400 z'amayelo ku mwaka, akaba yaba akubye kabiri mukeba we Cristiano Ronaldo uri muri Al Nassr.
Abafana ba FC Barcelona barifuza ko Lionel Messi agaruka(Net-photo)
