Andy Cole wahoze akinira Manchester United yagiriye iyi kipe inama yo kudasinyisha Harry Kane w'imyaka 29 ugiye kwinjira mu mwaka wa nyuma w'amasezerano ye muri Tottenham.
Ikipe ya Manchester United irajwe ishinga no gusinyisha rutahizamu muri iyi mpeshyi, ndetse Harry Kane na Victor Osimhen ni ba rutahizamu babiri bavugwa muri iyi kipe cyane.
Bivugwa ko mu gihe Tottenham yaba yemeye kurekura Harry Kane itazasaba ari munsi ya miliyoni 100 z'amapawundi kuri uyu rutahizamu w'umwongereza.
Andy Cole arabuza Manchester United gusinyisha Harry Kane
Andy Cole we avuga ko atizeye ko byagenda neza mu gihe iyi kupe yahoze akinira yaba yemeye gutanga aka kavagari kuri uyu musore uri hafi kuzuza imyaka 30.
Ati:"Manchester United ntabwo ikwiye kujya ku gisubizo cy'igihe gito nanone.
"Ntabwo bashobora kugenda ngo batange miliyoni 80 cyangwa 100 z'amapawundi kuri Harry Kane. Mu myaka ibiri bazahindukira bavuge ngo afite imyaka 32, reka dushake undi rutahizamu. Ntabwo bakwiye kwishyira muri uwo mwanya nanone.
"Iyo urebye ku bataka bakomeye Manchester United yatunze, ubona nka Robin van Persi, ariko igitangaje nuko yahagumye imyaka ibiri gusa, nyuma ye bagiye bahinduranya umwe ku wundi nko mu myaka ibiri gusa.
"Ikipe nka Manchester United ntabwo iba ikwiye gutunga abataka batandukanye mu myaka ibiri, ni ubusazi. Barabizi ubu ko bakwiye gusinyisha ubaha imyaka itanu."
Harry Kane ni rutahizamu umaze gutsindira u Bwongereza na Tottenham ibitego byinshi kurenza abandi, ndetse yakomeje kwigaragaza muri uyu mwaka w'imikino atsinda ibitego 29 mu mikino 47.
Tottenham iri ku mwanya wa karindwi muri shampiyona ya Premier League mu gihe isigaranye imikino ibiri yo gushaka itike ya Europa League, cyangwa byakwanga igakina Conference League.
Usibye Harry Kane, Manchester United ivugwa ku bandi ba rutahizamu barimo umunya-Nigeria Victor Osimhen ndetse n'umufaransa Randal Kolo-Muani.
Osimhen ni undi rutahizamu uvugwa ku isoko
