Biravugwa ko agent Jorge Mendes uhagarariye Cristiano Ronaldo yabwiye Manchester United kuvuga igiciro kuri Cristiano Ronaldo mu gihe akiri kugerageza gusohora umukiriya we muri Manchester United.
Uyu rutahizamu w'umunya-Portugal ashaka kuva i Manchester nyuma y'umwaka umwe gusa agarutse muri Manchester United ubwo yari avuye muri Juventus.
Ikipe ya Manchester United yo iracyashimangira ko uyu mukinnyi atagurishwa, mu gihe ndetse agifite n'amasezerano y'umwaka umwr kuko yari yasinye imyaka ibiri.
Ku rundi ruhande andi makipe yavugwaga ko yakwakira uyu mugabo arimo Chelsea, Real Madrid, Atletico Madrid na Bayern Munich asa n'ayamaze kuva muri uwo mushinga bitewe n'impamvu zitandukanye zirimo umushahara w'uyu mugabo n'imyaka ye.
Cristiano arifuza kujya mu ikipe izakina Champions league(Image:Getty)
Bivugwa ko uyu mugabo w’imyaka 37 yagerageje uko ashoboye ngo asohoke muri Manchester United ndetse akanasaba gusesa amasezerano, ariko ibyo bigaragara nk'ibidashoboka.
Nk'uko bitangazwa n'ikinyamakuru The Sun, Jorge Mendes yasabye Manchester United kuvuga igiciro cya Cristiano Ronaldo dore ko ngo hari n'ikipe imushaka kuri ubu.
Kugeza ubu ntihazwi neza amafaranga Manchester United yasaba kuri uyu mugabo kuko itaranemera kumugurisha. Ubwo yasinyaga mu mpeshyi ishize, Manchester United yamutanzeho miliyoni 12.9 z'amapawundi, atitsindira ibitego 24 mu marushanwa yose muri icyo gihe cy'umwaka umwe.
