APR FC yananiwe kurinda ibyagezweho inganya na Kiyovu Sports

APR FC yananiwe kurinda ibyagezweho inganya na Kiyovu Sports

 Nov 23, 2022 - 16:23

APR FC yanganyije na Kiyovu Sports mu mukino w'umunsi wa cumi wa shampiyona wabaye kuri uyu wa Gatatu.

Wari umukino wabereye kuri sitade ya Kigali i Nyamirambo aho ikipe ya APR FC yari yakiriye ikipe ya Kiyovu Sports yari iyoboye urutonde rwa shampiyona.

Ni umukino APR FC yasabwaga gutsinda kugira ngo igwize amanota 20 ihite inganya na Kiyovu Sports, bityo yiyongerere ikizere ku gikombe cya shampiyona cyo muri uyu mwaka w'imikino.

Abakinnyi APR FC yabanje mu kibuga

Abakinnyi Kiyovu Sports yabanje mu kibuga

Ikipe ya APR FC yinjiranye imbaraga nyinshi mu mukino itanga Kiyovu Sports kwinjira mu mukino, maze Mugisha Bonheur atsinda igitego cya mbere ku munota wa 13 ku mupira wari uvuye muri koruneri yari itewe na Niyibizi Ramadhan.

Bidatinze ikipe ya APR FC yabonye igitego cya kabiri ku munota wa 22 gitsinzwe na Byiringiro Lague wambuye umupira Nsabimana Aimable, maze ibitego biba bibiri bya APR FC ku busa bwa Kiyovu Sports.

Amakipe yombi yagiye kuruhuka nta kirahinduka maze mu gice cya kabiri umutoza Alain Landeut utoza Kiyovu Sports akora impinduka, azana abakinnyi nka Riyaad Nordien na Muhozi Fred.

Aba bakinnyi batangiye kugaragaza imbaraga muri uyu mukino maze bidatinze ku munota wa 54 Nordien ahindura umupira mwiza ba myugariro ba APR FC bananirwa kuwukiraho, Mugenzi Bienvenue ahita atsinda igitego cya mbere cya Kiyovu Sports.

Aha abafana ba Kiyovu Sports batangiye kugira ikizere gike ko bigishoboka ariko uburyo bakomeje kugerageza imbere y'izamu rya Pierre ntabwo bwagiye butanga umusaruro.

Ubwo umukino waganaga mu minota ya nyuma nibwo ku munota wa 86 Mugenzi Bienvenue yashyizemo igitego cya kabiri cya Kiyovu Sports, ku mupira n'ubundi wari uhinduwe na Riyaad Nordien.

Kunganya uyu mukino byatumye Kiyovu Sports ikomeza gufata umwanya wa mbere aho ifite amanota 21, naho APR FC ikaba iri ku mwanya wa Gatatu n'amanota 18 inafite umukino umwe w'ikirarane.

Wari umukino w'indya nkurye hagati ya APR FC na Kiyovu Sports