50 Cent yikomye Beyoncé kubera ibyo aheruka gukorera mu gitaramo

50 Cent yikomye Beyoncé kubera ibyo aheruka gukorera mu gitaramo

Jeremie NDIKUMANA Jeremie NDIKUMANA  Jun 30, 2025 - 09:14

Umuraperi wo muri Amerika, 50 Cent yanenze bikomeye umuhanzikazi Beyoncé ku bwo kugendera mu modoka iri mu kirere ifashwe n'imigozi mu gitaramo yakoreye mu mujyi wa Houston muri Texas mu ijoro ryo ku wa Gatandatu w'icyumweru dusoje, agaragaza ko ari ugushyira ubuzima bw'abantu mu kaga.

Ubwo Beyoncé yagenderaga muri iyi modoka azenguruka inyubako igitaramo cyaberagamo, imigozi yari ifashe iyo modoka yaje kugira ikibazo bituma imodoka ihagama ntiyongera kugenda.

Byabaye ngombwa ko Beyoncé bamumanuramo, ku bw'amahirwe ntiyakomereka cyangwa ngo agire ikindi kibazo ndetse no mu bitabiriye igitaramo ntawe wagize ikibazo. 

Beyoncé ubwo yageraga hasi ku rubyiniro yakomeje kuririmba nk'ibisanzwe, avuga ko nta bwoba yari afite kuko yari yizeye ko iyo agwa bari kumusaba (abafana).

Nyuma y'ibyo, 50 Cent yifashishije Instagram ye yagaragaje ko ibyo Beyoncé yakoze bidakwiye na gato kuko ari ugushyira ubuzima bw'abantu mu kaga.

Yavuze ko abantu benshi bashoboraga kugwirwa n'iyo modoka, ugasanga bahasize ubuzima cyangwa se bakaba bagira ikindi kibazo.

Mu bitekerezo byatanzwe n'abantu, bamwe bagaragaje ko bashyigikiye igitekerezo cya 50 Cent, ariko kandi abandi bavuga ko uku ari ugushaka gushotora Beyoncé.

Beyoncé ubwo yataramiraga muri Houston yaje mu modoka iri mu kirere 

Imodoka Beyoncé yajemo yarahagamye ari hejuru y'abantu