World Cup 2022:Ubudage bwinjiye mu irushanwa macuri butsindwa n'Ubuyapani

World Cup 2022:Ubudage bwinjiye mu irushanwa macuri butsindwa n'Ubuyapani

 Nov 23, 2022 - 17:38

Ikipe y'igihugu y'Ubudage yatwaye Igikombe cy'isi cya 2014 yatangiye nabi muri Qatar itsindwa n'Ubuyapani mu itsinda E.

Ni umunsi wa kane w'Igikombe cy'isi cya 2022 aho amakipe akiri gukina umunsi wa mbere mu matsinda aherereyemo. Kuri sitade Khalifa International Stadium niho Ubudage n'Ubuyapani bacakiraniye.

Ni Ubudage bwaje mu mukino buhabwa amahirwe menshi cyane imbere y'Ubuyapani, dore ko ari ikipe yatwaye ibikombe by'isi bine byose kuva cyatangira gukinirwa.

Ubudage bwatangiye bwataka cyane ari nako Ubuyapani burwana no gukina izamu ryabwo, ariko ku munota wa 32 Ubudage bubona penariti ku ikosa ryari rikorewe David Raum.

Iyi penariti yatewe neza cyane na Ilkay Gundogan ahita atsindira Ubudage igitego cya mbere, ikizere cy'Abadage kirushaho kuzamuka.

Igice cya mbere cyarangiye ari igitego kimwe cy'Ubudage ku busa bw'Ubuyapani, ariko mu gice cya kabiri abayapani baza bariye amavubi barwana ku izamu ryabo ariko bakanyuzamo bakataka.

Ubuyapani bwabonye igitego cyo kwishyura ku munota wa 75 gitsinzwe na Ritsu Doan wari umaze kujya mu kibuga ku munota wa 71 asimbuye Ao Tanaka.

Abayapani batunguye abadage barabatsinda

Ubudage bwahise bwongera gushyira imbaraga nyinshi mu kwataka ngo bushake igitego cy'intsinzi ariko ku munota wa 83 Takuma Asano abatsinda igitego cya kabiri, ni nyuma y'umupira muremure yari aherejwe na Ko Itakura.

Gutsindwa uyu mukino byashyize Ubudage mu mibare myinshi kuko ubu busabwa gustinda ikipe y'igihugu ya Esipanye na Costa Rica, bitaba ibyo bukaba buri mu byago byo kuviramo mu matsinda nk'uko byagenze mu 2018.

Undi mukino wabaye uyu munsi kandi ni mu itsinda F aho Maroc yanganyije na Croatia 0-0, Maroc ikaba ikipe ya kabiri yo muri Afurika ibashije kubona inota mu gikombe cy'isi cya 2022 nyuma ya Tunisia yanganyije na Denmark.

Penariti yatewe na Gundogan ntiyahesheje Ubudage intsinzi