Uyu mukino wo mu itsinda H wabereye kuri sitade Education City usifurwa n'umwongereza Antiny Taylor usanzwe agaragara cyane muri Premier League.
Abanyafurika benshi bari biteze kureba uko Ghana iraza kwitwara imbere ya Korea y'epfo nyuma yo gutsindwa na Portugal bigoranye mu mukino ubanza, mu gihe Korea y'epfo yo yanganyije na Uruguay ubusa ku busa.
Ikipe y'igihugu ya Korea y'epfo yihariye umupira iminota 20 ya mbere yataka izamu rya Ghana cyane ndetse iyitera koruneri zisaga ikenda muri iyo minota ariko Ghana yabashije kwihagararaho ubundi nyuma y'aho nayo itangira kwataka.
Nyuma y'iminota ine gusa Ghana icanye umuriro, iyi kipe yabonye igitego ku munota wa 24 gitsinzwe na myugariro Mohamed Salisu. Nyuma y'iminota icumi, Andre Ayew yahereje umupira Mohamed Kudus ahita atsindira Ghana igitego cya kabiri cyatanze ikizere cyinshi ku banye-Ghana ko bacyura amanota atatu.
Ibyo bitego bibiri bya Ghana nibyo byabaye itandukaniro mu gice cya mbere, ubundi mu gice cya kabiri Korea y'epfo igaruka gahunda ari gushaka uko yishyura ibitego yatsinzwe.
Bidatinze ku munota wa 58 Li Kan-in wari winjiye mu kibuga asimbuye, yahaye umupira rutahizamu Jo Gue-Sung atsinda igitego cya mbere cya Korea y'epfo, ubundi itangira igitego cya kabiri.
Nyuma y'iminota itatu gusa Jo Gue-Sung yongeye guhabwa umupira na Kim Jin-Su ahita atsindira Korea y'epfo igitego cya kabiri, bituma amakipe yombi anganya ibitego 2-2.
Nyuma y'iminota mike bigishyushye nibwo Gideon Mensah yazamukanye umupira awuhindura imbere y'izamu rya Korea y'epfo Inaki Williams arawuhusha, uyu mupira wasanze Mohamed Kudus ahita atsinda igitego cya gatatu cya Ghana.
Kuva kuri iki gitego Korea y'epfo yacanye umuriro imbere y'izamu rya Ghana, umutoza Otto Ado utoza Ghana akomeza gukora impinduka ashyiramo ba myugariro abasha kurinda izamu rye acyura intsinzi.
Gutsinda uyu mukino byatumye Ghana igira amanota atatu ikaba isabwa kuzatsinda Uruguay mu mukino wa nyuma. Korea y'epfo yo ifite inota rimwe.
Umukino ukurikira muri iri tsinda ni Portugal na Uruguay zirakina ku isaha ya saa 21:00. Mu gihe zitarakina, Portugal ifite amanota atatu naho Uruguay yo ifite inota rimwe yakuye kuri Korea y'epfo.
Korea y'epfo yarwanyije ibura igitego cyo kwishyura
