Umusifuzi w'umunya-Australia witwa Khoder Yaghi yahuye n'isanganya rikomeye mu kibuga arakubitwa agirwa intere n'abo yasifuriraga, mu mukino wahuzaga ikipe ya Padstow Hornets na Greenacre Eagles zo mu kiciro cya mbere muri Australia.
Mu mashusho yagiye hanze agaragaza uyu musifuzi Yaghi yatakwa mu kibuga n'umukinnyi wamukubise amangumi mu mutwe no mu maso ku buryo butarimo imbabazi na nke.
Nyuma yo guhosha iyi mirwano, umunwa Khoder Yaghi wagaragaraga wuzuye amaraso ndetse bikavugwa ko igufa rye rifata amenyo ryangiritse akaba hari n'amenyo yaba yakutse.
Yaghi yamvikanye ahaguruka avuga ati:"Amennye ijigo!"
Police yo muri New South Wales, agace ko mu mujyi wa Sydney kabareyemo ibi, yatangaje ko yataye muri yombi umugabo w'imyaka 25 ukurikiranyweho gukubita uyu musifuzi, akaba ari uw'ikipe ya Greenacre.
Yaghi yari yuzuye amaraso ku mwunwa
Umusifuzi Khoder Yaghi we yahise yerekezwa mu bitaro aho akomeje koroherwa ndetse bikaba biteganyijwe ko kuri uyu wa mbere abagwa igufa rifata amenyo rigasubizwa ku murongo.
Ikipe ya Greenacre Eagles kandi yahise isohora itangazo nyuma y'ibi, ivuga ko bakuye ikipe yabo mu irushanwa kubera ibyakozwe n'umukinnyi wabo.
Ryagiraga riti:"Nyuma y'ibyabaye ubwo umukino wari urangiye, ubuyobozi bw'ikipe yacu bwafashe umwanzuro wo gukura ikipe mu irushanwa mu gihe umwaka w'imikino usigaje. Ibi biributsa bose ko ihohoterwa ritazigera ryihanganirwa mu ikipe yacu."
Uyu murwano wateje imvururu mu kibuga
