Mu ijoro ryo kuri uyu wa Kabiri nibwo hatangiye imikino yo kwishyura muri kimwe cya munani cya UEFA Champions League, aho ikipe ya Chelsea yari yakiriye Borussia Dortmund ku kibuga Stamford Bridge.
Umukino ubanza aya makipe yombi yari yatandukanyijwe n'igitego kimwe cya Borussia Dortmund cyatsinzwe na Karim Adeyemi utari uhari kuri uyu mukino w'iri joro kubera ikibazo cy'imvune.
Chelsea yasabwaga gutsinda Borussia Dortmund ishyizemo ikinyuranyo cy'ibitego bibiri, ndetse ni nako yaje kubigenza kuko abasore ba Graham Potter babashije gutsinda ibitego bibiri nta gitego binjijwe.
Igitego cya mbere Chelsea yagitsinze ku munota wa 43 gitsinzwe na Raheem Sterling, akaba ari igitego yatsinze nyuma yo kugerageza ubundi buryo butandukanye imbere y'izamu ariko ntibiyihire.
Igitego cya kabiri cyabonetse ku munota wa 53 kuri penariti yatewe na Kai Havertz. Nyuma y'uko Niklas Sule yari amaze gukora umupira mu rubuga rw'amahina, Kai Havertz yahawe penariti ariko umupira awutera ipoto uvamo basanga umuzamu yari yarenze umurongo, Kai ayisubiramo arayinjiza.
Abasore ba Borussia Dortmund bakoresheje iminota 30 yari isigaye ndetse n'iminota itandatu yongeweho, ariko Chelsea yugarira neza umukino urangira nta gitego bayinjije. Ku giteranyo byabaye 2-1 bituma Chelsea ikomeza muri kimwe cya kane.
Undi mukino wabaye muri iri joro, wabereye kuri sitade Estádio de Luz muri Portugal aho Benfica yari yakiriye Club Brugge yo mu Bubirigi nyuma y'uwabereye mu Bubirigi warangiye Benfica itsinze 2-0.
Muri uyu mukino Club Brugge yanyagiwe ibindi bitego 5-1 ku giteranyo biba ibitego 7-1, bituma Benfica nayo ihita yerekeza muri kimwe cya kabiri.
Kuri uyu wa Gatatu naho hateganyijwe imikino ibiri. Bayern Munich iraza kwakira PSG, mu gihe umukino ubanza PSG yatsinzwe igitego kimwe ku busa. Ku rundi ruhande Tottenham irakira AC Milan, umukino ubanza Tottenham yatsinzwe kimwe ku busa, iyi mikino yose ikaba iraba saa 22:00.
Chelsea yabashije kwigizayo Dortmund iyiha inzira(Net-photo)
