Nyuma yo gusubiramo amashusho hifashishijwe VAR, byagaragaye ko Embolo yari yakoze uburiganya mu ikosa yaregaga ko yakorewe n'Umunya-Argentine, Leandro Paredes. Nyuma yuko hakurikijwe itegeko rya "mistaken identity", ikarita yahise ihabwa Embolo aho guhabwa Paredes.
Kubera ko Embolo yari asanzwe afite indi karita y'umuhondo yahawe mbere muri uwo mukino, yahise yerekwa ikarita itukura asohorwa mu kibuga, bituma u Busuwisi bukomeza umukino busigaranye abakinnyi 10.
Nubwo bwakomeje kwihagararaho bukagera mu minota y'inyongera, ku munota wa 112 Julián Álvarez yatsinze igitego cyahaye Argentine gukomeza kuyobora umukino, mbere y'uko Lautaro Martínez ashyiramo icya gatatu, umukino urangira Argentine itsinze ibitego 3-1.
Nyuma y'umukino, umutoza w'u Busuwisi, Murat Yakin ntiyahishe akababaro yatewe n'icyemezo cyafashwe n'umusifuzi, avuga ko yababajwe n’uburyo bahawe igihano kitari gikwiriye.
Yagize ati: "Twahanwe n'itegeko mbona ridakwiriye. Birababaje cyane kuba twasezerewe muri ubu buryo. Abakinnyi banjye bakoze ibishoboka byose kandi ni intwari."
Yakomeje anenga umusifuzi w'Umunya-Portugal, João Pinheiro, avuga ko yafashe icyemezo kitari cyo, ndetse ko habaye ikosa ryari rito cyane ku buryo ritagombaga kuvamo ikarita y’umutuku.
Kapiteni w'u Busuwisi, Granit Xhaka na we yavuze ko iyo karita yababaje buri mukinnyi wese w'u Busuwisi, agaragaza ko ritari ikosa rikwiriye gutangirwa ikarita itukura.
Byari ku nshuro ya kabiri muri iri rushanwa hifashishijwe itegeko rya "mistaken identity", rikaba riha VAR uburenganzira bwo gukosora igihe umusifuzi yibeshye akereka ikarita umukinnyi utari ukwiriye kuyihabwa.
Mu minsi ishize kandi, ishyirahamwe ry'umupira w'amaguru mu Misiri na ryo ryari ryagaragaje kutishimira imisifurire mu mukino ryatsinzwemo na Argentina, nubwo abenshi babifata nk’impamvu zo gutsindwa ku makipe aba yakinnye n'iyi kipe yo muri America y’Amajyepfo.
Umwanditsi: NIYOMUKIZA Gratien
