Kugeza n'ubu bamwe mu bafana ba Arsenal ntibarabasha kwakira uburyo batwawemo Igikombe cya shampiyona na Manchester City, nyuma yo kumara ¾ bya shampiyona aribo bayoboye urutonde rw'agateganyo.
Iyi kipe ikunze gutazirwa abarashi ikomeje gushaka abakinnyi bazayifasha kongera imbaraga mu bo isanganwe, ku buryo izagaruka muri shampiyona y'umwaka utaha ikomeye kurusha uko yari imeze mu mwaka w'imikino ushize.
Umukinnyi wa mbere umutoza Mikel Arteta yerekejeho amaso ni umwongereza Declan Rice ukinira ikipe ya West Ham United. Arsenal imaze igihe kitari gito mu biganiro n'iyi kipe, n'ubwo itarabasha kuzuza miliyoni zirenga 100 z'amapawundi isabwa ngo isinyishe uyu musore.
Mu gihe Arsenal ikiri kubyigaho niba ishobora gutanga aya mafaranga isabwa, bivugwa ko ikipe ya Manchester City nayo yamaze kwerekeza amaso kuri uyu musore kandi ikaba nta kibazo ifite cyo gutanga amafaranga West Ham United yifuza ngo irekure Declan Rice.
Manchester City ya Pep Guardiola nayo irifuza Declan Rice(Image:Getty)
Inkuru dukesha ikinyamakuru The Mirror iravuga ko Manchester City iratanga miliyoni 100 z'amapawundi muri West Ham United, gusa bakayatanga mu gihe uyu musore w'imyaka 24 nawe yaba yifuza kujya muri iyi kipe itozwa na Pep Guardiola.
Mu gihe uyu musore yaba nta bushake bwo kwerekeza i Etihad afite, Manchester City izabivamo urugamba iruharire ikipe ya Arsenal yamuvuzweho mbere.
Declan Rice amaze amezi atari make avugwa mu ikipe ya Arsenal, ndetse bivugwa ko uyu musore nawe yifuza kuba yayijyamo. Ibi ni nabyo byatumye ikipe ya Bayern Munich nayo yamwifuzaga, ikurayo amaso.
Nyuma yo kwegukana ibikombe bitatu muri uyu mwaka w'imikino, ikipe ya Manchester City hari abakinnyi bari mu muryango usohoka. Aba ni nka Ilkay Gundogan werekeje muri FC Barcelona, Bernardo Silva ushobora kujya muri PSG ndetse na Aymeric Laporte.
Iyi kipe nayo ni nako yahise itangira kubasimbuza. Manchester City yamaze gusinyisha Matteo Kovacic yakuye muri Chelsea, ndetse yamaze kumvikana na myugariro Josko Gvadiol wa RB Leipzig.
Arsenal kandi nayo ntabwo yicaye kuko ikomeje gushaka abakinnyi. Usibye Declan Rice, iyi kipe yamaze gusinyisha Kai Havertz wavuye muri Chelsea, ikomeje ibiganiro na Ajax Amsterdam kuri myugariro wayo Jurrien Timber.
Declan Rice yabaye imari ishyushye muri Premier League(Net-photo)
