Ni ubwa mbere aya makipe yombi yari ahuriye mu marushanwa ya UEFA kuva yashingwa, haba muri UEFA Europa League cyangwa UEFA Champions League ndetse yewe na UEFA Conference League.
Ikipe ya Inter Milan yashakaga gutwara Champions League ya kane mu mateka yayo mu mikino ya nyuma irindwi imaze gukina, mu gihe Manchester City yo yashakaga igikombe cya mbere nyuma yo gutsindirwa ku mukino wa nyuma na Chelsea mu 2021.
Ku ruhande rw'abatoza ku mpande zombi, Pep Guardiola wa Manchester City yageragezaga gutwara Champions League ya gatatu nyuma y'ebyiri yatwariye muri FC Barcelona mu 2009 na 2011.
Ni mu gihe kandi umutoza Simon Inzaghi we yashakaga Champions League ya mbere nk'umutoza, ariko akaba yari afite amateka ko mu mikino ya nyuma irindwi amaze gukina atajya atakaza.
Rodri niwe wacunguye Manchester City
Manchester City yatangiye umukino igerageza gukina ihererekanya umupira nk'uko bisanzwe, mu gihe Inter Milan nayo yatakaga ikoresheje imipira yo kwihuta.
Amakipe yombi yasatiranye ariko imikino 45 irinda irangira hongerwaho indi ibiri ariko habura ikipe ireba mu izamu, Szymon Marcianiak yemeza ko bajya kuruhuka banganya ubusa ku busa.
Mu gice cya kabiri Inter Milan yaje iri hejuru igerageza uburyo bwinshi imbere y'izamu n'ubwo itamaranaga umupira umwanya munini nka Manchester City, ariko igihe yawufatiraga yakoraga igikorwa giteye ubwoba.
Ku munota wa 68 nibwo Manchester City yafunguye amazamu ku gitego cyatsinzwe na Rodri nyuma y'umupira wari uhinduwe mu rubuga rw'amahina na Bernardo Silva hakabura uwuteramo cyangwa ngo akize izamu.
Nyuma y'iki gitego abasore ba Inter Milan bahise barushaho kwataka izamu rya Manchester City ndetse bahusha ibitego bigiye bitandukanye byabazwe, ariko Manchester City yabashije kwihagararaho iminota 90 irarangira hongerwaho itanu nayo irangira bakiyoboye.
Manchester City yegukanye Champions League ya mbere mu mateka yayo, mu gihe Pep Guardiola yegukanye iya gatatu anakuraho ibyavugwaga ko ntahandi yabikora usibye muri Barcelona.
Manchester City yongereye Champions League kuri Premier League na FA Cup muri uyu mwaka
