Cristiano Ronaldo yatandukanye na Manchester United

Cristiano Ronaldo yatandukanye na Manchester United

 Nov 22, 2022 - 20:12

Ikipe ya Manchester United yamaze gutangaza ko yatandukanye na Cristiano Ronaldo wari rutahizamu wayo.

Cristiano Ronaldo yamaze gutandukana na Manchester United nyuma y'umwaka umwe gusa agarutse muri iyi kipe yamumenyekanishije mu isi ya ruhago.

Ni umusore umaze iminsi agarukwaho cyane bitewe n'amagambo aherutse kuvuga mu kiganiro yagiranye n'umunyamakuru Piers Morgan aho yibasiye iyi kipe yakiniraga, umutoza wayo n'abaherwe bayo.

Ronaldo yaravuze ati:"Ndatekereza ko abafana bakwiye kumenya ukuri. Ikipe nyifuriza ibyiza ni na yo mpamvu naje muri Manchester United, ariko hari ibintu imbere mu ikipe bitadufasha kujya ku gasongero nka City, Liverpool na Arsenal ubu. Numva naragambaniwe na Manchester United."

Uyu mugabo w'imyaka 37 yavuze ibi kuko ngo  ibigenze nabi muri iyi kipe ari we bijya ku mutwe bityo arimo ahatirizwa kuyisohokamo.

Ati:"Manchester United yagerageje kumpatiriza kuyivamo. Ntabwo ari umutoza ahubwo n’abandi bantu bari hafi y’ikipe. Numva naragambaniwe n’ikipe.

"Numva ko hari abataranshakaga hano muri Manchester United, si uyu mwaka gusa ahubwo n’umwaka ushize."

Ronaldo yagarutse ku batoza batoje Manchester United mu mwaka w'imikino ushize, buri umwe agenda agira icyo amuvugaho.

Yageze kuri Ralf Rangnick Ati:"Niba utari n’umutoza, ni gute ugiye kuyobora Manchester United? Nta nubwo nigeze mwumvaho."

Criatiano Ronaldo yatandukanye na Manchester United

Kuri Erik Ten Hag bakomeje gukina umukino w"injangwe n'imbeba, avuga ko atigeze amwubaha dore ko atamuhaye umwanya wo gukina abanza mu kibuga ndetse akagerekaho no kugenda amuha ibihano.

Ronaldo ati:"singomba kubaha Ten Hag kubera ko na we nta nyubaha... Biroroshye."

Ku mugoroba wo kuri uyu wa Kabiri nibwo Manchester United ibinyujije ku mbuga zayo nkoranyambaga, yatangaje ko yamaze gutandukana na Cristiano Ronaldo binyuze mu bwumvikane.

Manchester United kandi yashimiye uyu mugabo uruhare yagize mu byo iyi kipe yagezeho mu bihe bibiri bitandukanye yayikinnyemo.

Nyuma y'ibi, Cristiano Ronaldo nawe yahise asohora itangazo yemeza ko koko yatandukanye na Manchester United ariko yongeraho ko azahora akunda abafana bayo, ndetse ko avuga ko yifuriza iyi kipe intsinzi muri uyu mwaka w'imikino no mu gihe kizaza.