Gianluigi Buffon afite amasezerano mu ikipe ya Parma iri mu kiciro cya kabiri mu Butariyani, ikaba ari nayo kipe yazamukiyemo mbere yo kwerekeza muri Juventus yubakiyemo ibigwi muri ruhago.
Inkuru dukesha ikinyamakuru Corriere dello Sports cyandikira mu Butariyani, iravuga ko ikipe yo muri Saudi Arabia itatangajwe izina yifuza gusinyisha Gianluigi Buffon ikajya imuhemba miliyoni 25 z'amapawundi ku mwaka.
Buffon akomeje gutekereza kuri aya mafaranga ari guhabwa n'iyi kipe yo muri Saudi Arabia, n'ubwo bivugwa ko yarimo atekereza ku myaka yazahagarikiraho umupira w'amaguru nk'uwabigize umwuga.
Uyu mugabo w'imyaka 45 yakinnye imikino 17 muri Parma muri shampiyona y'umwaka ushize, ukaba ari umwaka utaramuhiriye kuko yagizemo ikibazo cy'imvune y'imikaya.
Parma yageze mu mikino ya kamarampaka igeeageza kuzamuka mu kiciro cya mbere ariko itsindwa n'ikipe ya Cagliari, aho Buffon atakinnye umukino wo kwishyura kubera imvune y'impfundiko.
Uyu mugabo wafashije u Butariyani kwegukana Igikombe cy'isi cya 2006, yatangiye urugendo rwa ruhago mu 1995 muri iyi kipe ya Parma arimo kuri ubu. Iyi kipe yayivuyemo nyuma y'imyaka itandatu yerekeza muri Juventus, nayo yavuyemo mu 2018 yerekeza muri PSG.
Mu myaka ibiri ishize nibwo yagarutse mu ikipe ya Parma nyuma yo kugaruka muri Juventus avuye muri PSG. Aramutse yemeye kwerekeza muri Saudi Arabia yaba ateye ikirenge mu cy'abandi bakinnyi bamaze kwerekezayo barimo Cristiano Ronaldo, Karim Benzema, Kalidouc oulibaly, N'Golo Kante n'abandi.
Buffon arifuzwa n'ikipe yo muri Saudi Arabia (Image:Getty)
