Ku gicamunsi cyo kuri uyu wa Gatanu mu Nzove nibwo ikipe ya Rayon Sports yatangiye imyitozo yitegura umwaka w'imikino 2023/2024 ahagaragayemo bamwe mu bakinnyi bashya ikipe ya Rayon Sports iherutse gusinyisha.
Iyi myitozo yagaragayemo myugariro Bugingo Hakim ukina ku ruhande rw'inyuma ibumoso wavuye mu ikipe ya Gasogi United, hagaragayemo kandi Serumogo Ali ukina inyuma ku ruhande rw'iburyo na myugariro wo mu mutima w'ubwugarizi Nsabimana Aimable nawe wakiniraga Kiyovu Sports.
Si abakinnyi bashya gusa bagaragaye mu myitozo ya Rayon Sports kuri uyu munsi kuko bakoranye n'abandi basanzwe barimo nka myugariro Rwatubyaye Abdoul na Mitima Isaac, Ngendahimana Eric, Master ndetse n'abandi.
Iyi myitozo yari iyobowe na Rwaka wari umutoza wungitije Haringingo Francis mu mwaka ushize w'imikino, ndetse bikaba bivugwa ko ashobora kungiriza umunya-Tunisia Yamen Alfati uherutse gusinyira Rayon Sports nk'umutoza mukuru.
Nsabimana Aimable yatangiye imyitozo muri Rayon Sports
Serumogo Ali nawe yari mu myitozo ya mbere muri Rayon Sports
Umutoza Rwaka niwe wayoboye imyitozo