Cristiano Ronaldo yatwaye Ballon d'Or mu 2008, 2013,2014, 2016 na 2017, muri rusange akaba yaratwaye Ballon d'Or eshanu ariko akaba akibitse enye gusa kuko indi yagurishijwe.
Uyu mupira wa zahabu uhabwa umukinnyi wahize abandi mu mwaka utangwa na France Football, waguzwe n'umuherwe witwa Idan Ofer ukomoka muri Israel, akaba abarirwa imitungo y'agaciro ka miliyari umunani z'amapawundi.
Jorge Mendes ari kumwe na Idan Ofer waguze iyo Ballon d'Or(Net-photo)
Inkuru dukesha ikinyamakuru Marca cyandikira muri Espagne itangaza ko Ballon d'Or Cristiano Ronaldo yahawe mu 2013 ariyo yagurishijwe, ikaba yaragurishijwe mu 2017 mu gikorwa cyo gushaka amafaranga yo gufasha.
Ronaldo ntiyagaragaye mu gikorwa cyo kugurisha iyi Ballon d'Or ahubwo hari Jorge Mendes ariwe wari umu-agent we icyo gihe, amafaranga yavuyemo ahita yerekezwa mu muryango umwe(foundation) ufasha abana.
Iyi Ballon d'Or Idan Ofer yayitanzeho ibihumbi 540 by'amapawundi, akaba ari miliyoni zirenga 540 uzishyize mu manyarwanda.
Cristiano Ronaldo yatwaye iyi Ballon d'Or mu 2013 mu mwaka atizege atwaramo igikombe dore ko FC Barcelona yegukanye La liga, mu gihe Bayern Munich nayo yari yegukanye UEFA Champions League.
Gusa usibye kuba ataratwaye igikombe, uyu niwo mwaka Cristiano Ronaldo yatsinzemo ibitego byinshi kuko yatsinze ibitego 69 mu mikino 59 yakiniye Real Madrid n'ikipe y'igihugu ya Portugal.
Ronaldo ateruye Ballon d'Or ya 2013 (Image:Getty)
