Iminsi yari ibaye irindwi muri BK Arena hari kuberamo imikino ya BAL 2023, yakinwaga ku nshuro ya gatatu nyuma y'uko iya mbere yegukanwe na Zamalek yo mu Misiri mu gihe iya kabiri yegukanwe na Monastir yo muri Tunisia.
Ni umukino witabiriye na Perezida Paul Kagame, Umuyobozi wa BAL Amadou Gallo Fall, Umuyobozi w’Impuzamashyirahamwe y’Umupira w’Amaguru muri Afurika Patrice Motsepe n’abandi benshi, ndetse n'abandi bakunzi ba Basketball.
Umukino watangiye amakipe yegeranye cyane mu manota ariko mu minota ya nyuma y'agace ka mbere Al Ahly ibifashijwemo na Anunwa Omot na Amr Zahran, igasoza iyoboye ku manota 17-10.
Mu gace ka kabiri Al Ahly yagarutse nanone iri hejuru ariko AS Douanes ntiyayorohera dore ko mu minota ya nyuma bageze aho banganya 33-33 ariko abasore ba Al Ahly barimo Michael Thompson barayifasha ishyiramo ikinyuranyo cy'amanota atanu agace ka kabiri karangira ari 38-33.
Agace ka gatatu karangiye Al Ahly ikiyoboye umukino n’amanota 63 kuri 46 ya AS Douanes. Iyi kipe yo mu Misiri yakomeje gutsinda amanota menshi kuko yatsindaga amanota atatu mu gihe AS Douanes yageragezaga amanota atatu kenahi ntibiyikundire.
Umukino warangiye Al Ahly itsinze AS Douanes amanota 80-65, yegukana igikombe cya BAL 2023 ku nshuro ya mbere yari yitabiriye iyi mikino.
Ikipe yegukanye Igikombe cya BAL ihabwa ibihumbi 100 by'Amadorali, iya kabiri ihabwa ibihumbi 75 by'amardorali, iya gatatu igahabwa ibihumbi 55 by'amadorali mu gihe iya kane ihabwa ibihumbi 25 by'amadorali.
