Tariki 22 Ugushyingo 2022 nibwo Cristiano Ronaldo yatandukanye na Manchester United ku bwumvikane, nyuma y'amagambo uyu munya-Portugal yavuze kuri iyi kipe mu kiganiro yagiranye n'umunyamakuru Piers Morgan.
Nyuma y'iki gihe, uyu mugabo wari muri Qatar mu gikombe cy'isi cya 2022, amakipe yavuzwe ari menshi amakuru amwerekeza muri shampiyona zitandukanye ndetse no ku migabane itandukanye.
Muri ayo makipe yavuzwe cyane harimo ikipe yo muri Saudi Arabia yitwa Al-Nassr ishaka kumuhemba amafaranga menshi mu gihe andi makipe menshi akomeye ku isi adashaka kumwikoza.
Inkuru dukesha umunyamakuru Fabrizio Romano iravuga ko kuri ubu amasezerano hagati ya Cristiano Ronaldo na Al-Nassr yenda gusinywa, uyu mugabo akaba arasinya amasezerano azageza mu 2025 aho azajya ahembwa miliyoni zisaga 200 z'amayero ku mwaka.
Mu gihe Cristiano Ronaldo yaba amaze gusinya muri Al-Nassr azatangirana n'iyi kipe umwaka wa 2023, dore ko ubu nta kipe afite n'ubwo yari amaze iminsi akorera imyitozo ku bibuga bya Real Madrid.
Kuri ubu iyi kipe ya Al-Nassr iri ku mwanya wa kabiri muri shampiyona ya Saudi Arabia aho ifite amanota 23 ikaba irushwa amanota abiri na Al-Shabab iri ku mwanya wa mbere.
Cristiano Ronaldo ategerejwe muri shampiyona ya Saudi Arabia(Net-photo)
