Abafite amakipe muri Premier league bafite ubwoba ko ikipe ya Manchester United ishobora kwiyongera ku makipe afitwe n'ibihugu.
Sheikh Jassim bin Hamad Al Thani akomeje kuyobora urugamba rwo kugura iyi kipe akayikura mu biganza bya Family Glazer bayifite kuva mu 2005.
Abahagarariye Sheikh Jassim bavuga ko kuba ashaka kugura iyi kipe ntaho bihuriye na leta ya Qatar, ariko izina Nasser Al-Khelaifi uyobora PSG ryatumye benshi bongera kwibaza ku nkomoko y'amafaranga Sheikh Jassim ashaka gutanga kuri iyi kipe.
Nk'uko byatangajwe n'ikinyamakuru The Atletic, Nasser Al-Khelaifi yahuye na Family Glazer baganira ku kuba bakwemerera Sheikh Jassim kuba yagura Manchester United.
Al-Khelaifi niwe uyobora Qatar Sports Investment akaba ari ikigo cy'igihugu cya Qatar gishizwe gushora imari mu bikorwa bya siporo, nacyo kikaba kigenzurwa na Qatar Investment Authority ishiznwe ibyo gushora imari muri rusanze.
Nasser Al-Khelaifi kandi ari mu rwego rw'ubuyobozi(board) ba Qatar Investment Authority, ndetse bivugwa ko yasabwe na leta ya Qatar ibikorwa bya siporo bya leta ya Qatar ku isi yose nyuma y'uko iki gihugu cyakiriye Igikombe cy'isi cya 2022.
Qatar Sports Investment iherutse kugura imigabane mu ikipe ya Braga yo muri Portugal, ndetse mu ntangiro z'uyu mwaka byavuzwe ko Al-Khelaifi yaganiriye na Daniel Levy uyobora Tottenham ku kuba bashora imari muri iyi kipe.
Ikibazo nk'iki cyabayeho mu 2021 ubwo amakipe yo muri Premier League yari afite ubwoba ko abari bagiye kugura ikipe ya Newcastle United bari udukingirizo twa leta ya Saudi Arabia, uyu munsi nabwo hakaba hari ubwoba ko Sheikh Jassim ushaka kugura Manchester United yaba ari intumwa ya leta ya Qatar.
Abahagarariye Nasser Al-Khelaifi bahakanye ko uyu mugabo yaba afite ukuboko mu igurwa rya Manchester United, bavuga ko icyo yakoze ari ubujyanama gusa kuko we yamaze kugura ikipe ubwo Qatar Sports Investment yaguraga igice kinini cy'imigabane ya PSG mu 2011.
Sheikh Jassim aracyahatanye n'umwongereza Sir Jim Ratcliffe usanzwe afite kompanyi ya INEOS, akaba ashaka kugura 70% y'imigabane muri Manchester United ndetse afite ikizere kinshi ko azegukana iyi kipe.
Family Glazer ikomeje gutinda gufata icyemezo cy'uhabwa ikipe hagati ya Sir Jim Ratcliffe na Sheikh Jassim, kuko barindiriye kureba ko hari uwatanga miliyari esheshatu bifuza kuri iyi kipe ifite ibikombe bya shampiyona byinshi mu Bwongereza.
Mu gihe Sheikh Jassim yifuza kugura iyi kipe 100%, Ratcliffe we yemerera Family Glazer ko yabasigiramo imigabane mike ku buryo bazageza mu 2026 bakibona ku musaruro wa Manchester United.
Birakekwa ko Sheikh Jassim yaba ari intumwa ya leta ya Qatar(Image:Getty)
