Mu Ugushyingo nibwo Glazer family batangaje ko haramutse habonetse umuntu ugura imigabane muri Manchester United bamwemerera, cyangwa akagura ikipe yose.
Hari impande zitandukanye zikomeje kugaragaza ko zifuza kuba zagura iyi kipe y'i Manchester ihabwa agaciro ka miliyari esheshatu z'amapawundi, harimo umwongereza Sir Jim Ratcliffe unazwi ko ari umufana w'iyi kipe.
Kuri iyi nshuro inkuru dukesha Daily mail iravuga ko kompanyi y'ishoramari y'abanya-Qatar isanzwe ifite ikipe ya PSG, nayo yifuza kugura iyi kipe ifite ibikombe byinshi bya Premier League kurusha izindi zose.
Amakuru ahari aravuga ko aba banya-Qatar bateganya gutanga ubusabe bwabo(bid) bwa mbere muri iyi Gashyantare 2022, dore ko byitezwe ko Family Glazer nayo yenda gutanga umunsi ntarengwa wo kwakira ubusabe.
Usibye gutanga miliyari esheshatu ku ikipe, aba banya-Qatar baba banasabwa kuvugurura cyangwa kubaka sitade bundi bushya dore ko Old Trafford ishaje. Byitezwe ko iyi mirimo yatwara miliyari ebyiri z'amayelo, ndetse ngo ibi nta kibazo bibateye.
Mu gihe iyi kompanyi y'abanya-Qatar yaba iguze Manchester United byakongera kubyutsa ihangana rikomeye hagati yayo na Manchester City ifitwe n'abo muri Leta zunze ubumwe z'abarabu, ndetse hari kuza na Newcastle United yaguzwe n'abanya-Saudi Arabia.
Manchester Umited iri mu nzira zo kugurwa (Net-photo)
