World Cup 2022:Brazil ihabwa amahirwe menshi ku gikombe yatsinze Serbia iyitsindagira

World Cup 2022:Brazil ihabwa amahirwe menshi ku gikombe yatsinze Serbia iyitsindagira

 Nov 24, 2022 - 22:58

Ikipe y'igihugu ya Brazil yatangiye Igikombe cy'isi cya 2022 neza itsinda Serbia, igerekaho no kuyigisha umupira.

Ni umukuno benshi bari bategereje kureba uko ikipe y'igihugu ya Brazil yitwara mu mukino wa mbere mu gikombe cy'isi cya 2022, dore ko ari imwe mu makipe ahabwa amahirwe menshi yo kwegukana iki gikombe.

Brazil na Serbia ni amakipe yombi aherereye mu itsinda G yakiniye umukino wayo wa mbere kuri sitade yiswe Lusail Iconic, iherereye mu gace ka Lusail i Doha muri Qatar.

Nk'uko byari byitezwe, Brazil yaje mu mukino ifite ikizere cyo ku rwego rwo hejuru byagaragariraga mu buryo abasore bayo bahanahanaga agapira ari nako abanya-Serbia barwana ku izamu ryabo birinda gutsindwa igitego.

Uko iminota yagiye izamuka Serbia yagiye itinyuka itangira kujya inyuzamo igasatira izamu rya Brazil, ariko amakipe yombi arinda ajya kuruhuka ari ubusa ku busa.

Mu gice cya kabiri Brazil yagitangiranye imbaraga nyinshi ishaka igitego bikomeza kunanirana, ku munota wa 59 myugariro Alex Sandro arekura ishoti rikomeye ariko umupira ukubita ipoto uragaruka, abanya-Serbia bongera gukangarana.

Bidatinze ku munota wa 62 nibwo Neymar yafashe umupira yinjira muri ba myugariro ba Serbia yegezayo buri umwe, umupira awurekera Vinicius Junior awuteye umuzamu Vanja Milinkovic awukuramo usanga Richarlison ahagaze neza ahita atsinda igitego cya mbere cya Brazil.

Richarlison yatsinze igitego kidasanzwe

Serbia yahise yatsa umuriro ku izamu rya Brazil, abasore ba Brazil bongera kuzamukana umupira ku munota wa 75 Vinicius atanga umupira kuri Richarlison wafunze umupira awuzamura ahita awerekeza mu izamu mu buryo buryoheye amaso.

Ikipe ya Brazil yakomeje kwigisha abanya-Serbia umupira ari nako umutoza Tite akora impinduka azana abakinnyi nka Fred, Rodrygo, Antony na Gabriel Jesus basimbuye Paqueta, Neymar, Vinicius na Richarlison.

Aba baje bajujubya ubwugarizi bwa Serbia bohereza amashoti akomeye mu izamu, ku munota wa 80 Rodrygo agerageje gushota umupira ukubita ipoto ivamo.

Umukino warangiye ari ibitego bibiri bya Brazil ku busa bwa Serbia bituma ihita iyobora itsinda G, ikurikiwe na Cameron n'Ubusuwisi banganyije, inyuma hakaza Serbia yatsinzwe.

Brazil yatangiranye intsinzi