Ishyirahamwe ry'umupira w'amaguru mu Bufaransa ryamaze kwemeza ko Karim Benzema atazakina Igikombe cy'isi kubera imvune yagize ku itako ry'ibumoso ubwo bari mu myitozo kuri uyu wa Gatandatu.
Uyu mugabo uherutse guhabwa Ballon d'Or ya 2022 yababaye mu itako ry'ibumoso ubwo bendaga kugana ku musozo w'imyitozo yo kuri uyu wa Gatandatu.
Nyuma yo kumucisha mu cyuma byemejwe ko Benzema yagize ikibazo cyo gucika kw'imikaya, ndetse bikaba bizasaba ibyumweru bitatu byibuzw ngo abe atangiye kugaruka mu kibuga.
Iki gikombe cy'isi kiratangira kuri iki Cyumweru tariki 20 Ugushyingo 2022 kizarangire tariki 18 Ukuboza 2022, ni icya mbere kigiye gukinwa hatarimo uheruka gutwara Ballon d'or kuva mu 1978.
Ubufaransa buzakina umukino wa mbere mu gikombe cy'isi ku wa Kabiri tariki 22 Ugushyingo 2022 aho baza bakina na Australia, bagatangira urugendo rwo kureba uko bakwisubiza igikombe batwaye mu 2018.
Amategeko ya FIFA avuga ko ubu Ubufaransa bugomba gutangaza umukinnyi uzaza gusimbura Karim Benzema mu gikombe cy'isi amasaha 24 mbere y'uko bukina umukino wa mbere.
Ubufaransa bukomeje kugorwa n'ibibazo by'imvune dore ko Presnel Kimpembe, Christopher Nkuku na Benzema bose bavunitse bari bahamagawe, bakaba biyongera kuri Paul Pogba na N'Golo Kante bavunitse mbere yo guhamagarwa.
Benzema agomba gusimbuzwa undi mukinnyi bidatinze
