Abakunzi ba Chorale Le Bon Berger ikorera mu cyahoze ari Kaminuza Nkuru y'u Rwanda i Butare Université Nationale du Rwanda (UNR) kuri ubu yabaye Kaminuza y'u Rwanda ishami rya Huye, yateguye igitaramo cy'akataraboneka bise 'Christmas Carols Concert' cyizafasha aba-kristu n'abandi bose kwizihiza Noheli no gusoza umwaka neza ndetse no kwinjira mu wundi mu mahoro.
Iyi Chorale yashinzwe mu 1997 ikaba iheruka no gusohora indirimbo "Urukundo Rwange ni ruke" yahimbwe na Padiri Theodose Mwitegere, bakaza kuyikora mu buryo bugezweho, bakaba batangaza ko iki gitaramo gitegerejwe ku 16 Ukuboza 2023, muri Salle ya Diocese Gatolika ya Butare yitwa "Centre st Jean Baptiste (PROCURE D’ACCEUIL).
Charale Le Bon Berger yateguje igitaramo cy'imbaturamugabo
Umuyobozi w'iyi Chorale Irankunda Regis akaba yatangarije THE CHOICE LIVE ko abakunzi babo bakwitega abahanzi bakunzwe mu Rwanda mu ndirimbo zinyuranye ziganjemo izo muri Kiliziya Gatolika barimo: Niyonzima Oreste, The Bright Five Singers itsinda ry’abaririmbyi batanu baririmba indirimbo zifasha benshi.
Barimo kandi Derrick Don Divin umuhanzi ukora akanasubiramo indirimbo gakondo zigakundwa na benshi, tutibagiwe na Gloria the Soprano umuririmbyikazi ufite ijwi ritangaje. Kwinjira muri iki gitaramo, bikaba bigusaba inoti y'igihumbi ku munyeshuri, ibihumbi bitatu ahasanzwe, bitanu muri VIP ndetse n'ibihumbi 10 muri VVIP.
Regis ubwo yatangazaga umwihariko w'iki gitaramo bari gutegura, akaba yagize ati " Umwihariko ni uko igitaramo cyacu cyitagenewe aba-kristu Gatolika gusa, kuko n'abandi bose bazibonamo kuko tuzaririmba indirimbo zinyuranye haba izo guhimbaza Imana zo muri Kiliziya Gatolika, ariko kandi tuzaririmba n'izindi zakunzwe zirimo nka 'Bella Ciao' yamenyekanye muri filime La Casa de papel."
Yunzemo ati " Tuzaririmba indirimbo za 'classic' zikunzwe na benshi, kandi n'izindi ndirimbo batuziho nka: Ndagiwe n'umushumba mwiza, Nyakira ndaje, Karame Dawe, n'izindi nyinshi." Akaba ashimangira ko bagomba gukomeza gushimangira izina ryabo ko ari Chorale ikomeye igwa mu ntege Chorale de Kigali.
Chorale Le Bon Berger, ikaba yaratangijwe n'Abakarisimatike igamije kuririmba indirimbo zo mu rurimi rw'ikinyarwanda, dore ko ubwo yashingwagwa, Chorale nyinshi zaririmbaga mu indimi z'amahanga. Guhera yashingwa, ikaba imaze kubarizwamo abaririmbyi ibihumbi 5,000. Ikaba yaherukaga gukora igitaramo mu Ugushyingo 2022 ubwo yizihizaga Yubile y'imyaka 25.
Chorale La Bon Berger
