Bikomeje kuvugwa ko Kylian Mbappe ari mu bakinnyi bifuzwa na Sheikh Jassim mu gihe yaba amaze kugura ikipe ya Manchester United mu mpeshyi ya 2023.
Uyu muherwe w'umunya-Qatar afite ikizere ko azabasha guhigika umwongereza Sir Jim Ratcliffe mu rugamba rwo gusimbura Family Glazer nka ba nyiri Manchester United.
Inkuru dukesha ikinyamakuru Bild cyandikira mu Budage, iravuga ko Kylian Mbappe azaba ari uwa mbere ku rutonde rw'abifuzwa na Manchester United, ndetse n'abandi bakinnyi babiri bakinana mu ikipe y'igihugu y'u Bufaransa aribo Kingsley Coman wa Bayern Munich na Edouardo Camavinga wa Real Madrid.
Byitezwe ko Erik Ten Hag azashaka abakinnyi bo kongera imbaraga mu ikipe ye mbere yo gutangira umwaka w'imikino 2023/2024, akubaka ikipe azakoresha muri Premier League, UEFA Champions League n'andi marushanwa.
Rutahizamu niwe mukinnyi wa mbere bizwi ko iyi kipe ikeneye nyuma yo gutandukana na Cristiano Ronaldo mu kwa mbere, ariko bivugwa ko izanongeramo umukinnyi wo hagati, myugariro ndetse ishobora no gusinyisha umusimbura wa David De Gea w'igihe kirambye.
Camavinga na Coman bari mu bifuzwa na Sheikh Jassim(Net-photo)
Sheikh Jassim na Sir Jim Ratcliffe bombi bamaze gutanga ubusabe bwa miliyari zirenga eshanu kuri Manchester United, ariko ntabwo Family Glazer iratangaza uwo yemeye guha ikipe, ndetse bivugwa ko bano banyamerika badashaka kuva muri iyi kipe burundu.
Kylian Mbappe yagiye avugwaho kuba ashaka kuva muri Paris Saint-Germain yerekeza muri Real Madrid, ariko kugeza ubu afite amasezerano azarangira mu mpeshyi ya 2024. Uyu muherwe we bivugwa ko ari tayali kuba yasuka ifaranga akamwerekeza mu Bwongereza.
Edouardo Camavinga yerekeje muri Real Madrid mu mwaka ushize ariko uyu mwaka yisanze akina ku ruhande rw'ibumoso inyuma, aho gukina hagati nk'uko bisanzwe. Ndetse kandi mu gihe Real Madrid yasinyisha Jude Bellingham nk'uko bivugwa, umwanya wo gukina uyu musore yabonaga ushobora kugabanuka.
Kylian Mbappe niwe uyoboye abifuzwa na Sheikh Jassim(Net-photo)
