Nyuma yo kunganya ibitego 2-2 i Camp Nou mu cyumweru gishize, kuri uyu wa Kane saa 22:00 i Old Trafford nibwo Manchester United na FC Barcelona zagomaga kwisobanura hakamenyekana ikipe ikomeza n'isigara.
FC Barcelona yaburaga abakinnyi bayo babiri bakomeye hagati mu kibuga aribo Pedri Gonzalez ndetse na Pablo Gavira, yari igihe guhangana n'ikipe ya Erik Ten Hag yagaruye abakinnyi bayo bose.
Ikipe ya Xavi yinjiye mu mukino mbere itangira guhererekanya neza byanatumye ibona penariti ku munota wa 18, ikaba yatewe neza na Robert Lewandowski ndetse amakipe yombi ajya kuruhuka FC Barcelona iyoboye kubera igitego kimwe.
Hakiri kare mu gice cya kabiri, Erik Ten Hag yakoze impinduka zamubyariye umusaruro. Antony, Dalot na Garnacho binjiye mu kibuga, mu gihe Weghorst, Bissaka na Jadon Sancho basohotse mu kibuga.
Antony wagiye kuruhande rwariho Alejandro Balde bituma uyu musore wari wazonze Manchester United atongera kuzamuka cyane, maze iyi kipe ya Ten Hag nayo itangira kwataka ishaka igitego.
Ku munota wa 47 gusa Manchester United yabonye igitego cyo kwishyura cyatsinzwe na Fred, uyu munya-Brazil akaba yari ahawe umupira mwiza na Bruno Fernandes.
Byategereje umunota 73 Manchester United ibona igitego cya kabiri cyatsinzwe na Antony, ubundi ibintu bikomeza kuba bibir ku ruhande rw'ikipe ya Xavi kuko igiteranyo cyari kibaye 4-3.
FC Barcelona yahise ikanguka yongera kwataka ishaka kureba uko yabona igitego cyo kwishyura ndetse irema uburyo bukomeye imbere y'izamu rya David De Gea, ariko ubwugarizi bwa Manchester United bubyitwaramo neza basoza nta kindi gitego kibonetse.
Iyi yari imikino ya kamarampaka yo gushaka amakipe asanga andi umumani muri kimwe cya munani, tombora ya kimwe cya munani ikaba iraba kuri uyu wa Gatanu saa 13:00.
Amakipe yakomeje muri kimwe cya munani ni Sporting CP, Bayer Leverkusen, Juventus, Sevilla, AS Roma, Union Berlin, Shakhtar Donetsk na Manchester United.
Aya makipe kandi aje yiyongera ku yandi makipe yabonye itike ya kimwe cya munani kuko yayoboye amatsinda yayo. Ayo makipe ni Arsenal, Fenerbahçe, Real Betis, Union Saint-Gilloise, Real Sociedad, Freiburg, Ferencváros na Feyenoord.
Lewandowski niwe wafunguye amazamu
Abakinnyi ntiboroheranye ku mpande zombi
Fred na Antony nibo batsindiye Manchester United
