Imikino umunani yo kwishyura muri kimwe cya munani cya UEFA Europa League yakinwe kuri uyu wa Kane, aho yakinwe mu bice bibiri.
Imikino ine yatangiye ku isaha ya saa 19:45 yasize ikipe ya Manchester United itsindiye Real Betis iwayo igitego kimwe ku busa cyatsinzwe na Marcus Rashford, bituma Manchester United isezerera Real Betis ku giteranyo k'ibitego 5-1.
Juventus yatsinze Freiburg ibitego 2-0 biba 3-0 ku giteranyo, Feyenoord itsinda Shakhtar Donetsk ibitego 7-1 biba 8-2 ku giteranyo, mu gihe Fenerbahce yatsinze Sevilla igitego kimwe ku busa ariko kuko umukino ubanza Sevilla yatsinze 2-0, byatumye Sevilla ikomeza ku giteranyo cya 1-2.
Manchester United ikomeje umujyo wo gushaka igikombe cya kabiri muri uyu mwaka(Net-photo)
Ku isaha y'i saa 22:00 naho hari hateganyijwe indi mikino ine yarimo Arsenal yisobanuraga na Sporting CP nyuma yo kunganya ibitego 2-2 mu mukino ubanza wabereye muri Portugal.
Ni umukino Arsenal itatinze kubona igitego kuko ku munota wa 19 gusa Gabriel Martinelli yahaye umupira Granit Xhaka agahita awerekeza mu rushundura.
Arsenal yasoje igice cya mbere iyoboye umukino, ariko iki gitego cyaje kwishyurwa ku munota wa 62 ku gitego cyatsinzwe na Pedro Goncalves bihita biba 3-3 ku giteranyo.
Sporting CP yabashije kwihagararaho isoza iminota 90 ntakindi gitego itsinzwe, hongerwaho iminota 30. Sporting yakomeje umutsi n'ubwo umukinnyi wayo Manuel Ugarte yeretswe ikarita itukura ku munota wa 118 ubwo yerekwaga ikarita y'umuhondo ya kabiri.
Iminota 120 nayo yuzuye hatabonetse utsinda, maze Sporting CP yateraga penariti mbere ibasha kwinjiza eshanu zose. Kuri Arsenal ho Odegaard, Saka na Trossard bazinjije, maze Gabriel Martinelli ateye iya kane arayihusha, bihita bituma Arsenal isezererwa na Sporting Club de Portugal.
Indi mikino yabaga muri ayo masaha yarangiye Bayer Leverkusen itsinze Ferencvaros 2-0 bihita biba 4-0 ku giteranyo, Real Sociedad inganya na AS Roma 0-0 ariko Roma ikomeza kuko yatsinze 2-0 mu mukino ubanza.
Undi mukino waberaga mu Bubiligi Royale Union SG yatsinze Union Berlin 3-0 nyuma y'uko bari banganyije ibitego 3-3 mu mukino ubanza.
Tombora y'uko aya makipe azahura muri kimwe cya kane iraza kuba kuri uyu wa Gatanu ku isaha ya saa 14:00, nyuma ya tombora ya UEFA Champions League.
Arsenal isigaye muri shampiyona gusa (Image:433)
