Chelsea yakomeje urugendo rutaryohewe abafana itsindwa na Real Madrid ibitego 2-0 mu mukino wo kwishyura wa kimwe cya kane muri UEFA Champions League, byatumye Real Madrid yikomereza ku giteranyo cy'ibitego 4-0.
Nyuma yo gutsindwa na Brighton&Hove Albion mu Cyumweru gishize, Toddy Boehly yinjiye mu rwambariro rwa Chelsea aganiriza abakinnyi isaha irenga abagaragariza ko atishimiye uko aba basore be bari kwitwara mu kibuga.
Kuri uyu mugoroba nabwo yongeye kujya mu rwambariro rwa Chelsea nyuma yo gutsindwa na Real Madrid, ariko noneho uyu muherwe w'umunyamerika ntabwo yatinzemo kuko yamazemo iminota isaga icumi gusa.
Iyi kipe Toddy Boehly amaze gutangaho miliyoni zirenga 600 z'amapawundi agura abakinnyi, ikomeje kugora Frank Lampard mu guhitamo abakinnyi 11 ashyira mu kibuga. Chelsea yaraye ibanje mu kibuga idafitemo Mykhailo Mudryk, Raheem Sterling na Joao Ferix, abakinnyi batatu bahagaze miliyoni 257.5 z'amapawundi.
Chelsea ntirajya mu bihe byiza kuva yafatwa na Toddy Boehly(Net-photo)
Umunyabigwi wa Chelsea wayifashije gutwara ibikombe binyuranye, Didier Drogba, avuga ko iyi kipe yagiye ku rwego rwo hasi cyane ku buryo ubu binamugoye no kumenya ko ariyo.
Drogba ati:"Iyi kipe nsanzwe nyiziho urwego rwo hejuru, ariko uyu munsi ndabona biri kubura.
"Bagomba gusubira ku mahame n'indangagaciro bahoranye. Sinkiri kumenya ikipe yange."
Frank Lampard utoje ikipe ya Chelsea ntabwo yorohewe nyuma yo kugaruka, akaba akomeje no kwandika amateka mabi. Lampard niwe mutoza wa mbere wa Chelsea utsinzwe imikino ine ya mbere atoje. Chelsea ya Lampard yatsinzwe na Wolves, itsindwa na Real Madrid umukino ubanza, itsindwa na Brighton, yongeye gutsindwa na Real Madrid mu mukino wo kwishyura.
Lampard azagerageza kureba ko yatsinda umukino we wa mbere ku wa Gatatu w'icyumweru gitaha ubwo Chelsea izaba yakiriye Brentford i Stamford Bridge.
Drogba ahamya ko Chelsea yahinduye inyifato (Image:Getty)
