Biravugwa ko Cristiano Ronaldo ashaka kuva mu ikipe ya Al Nassr nyuma y'amezi atanu gusa asinyiye iyi kipe nyuma yo gutandukana na Manchester United ku bwumvikane.
Nyuma yo gusiga i Manchester ruri gushya kubera ikiganiro yagiranye na Piers Morgan, Ronaldo yasinye amasezerano muri Al Nassr azarangira mu 2025 aho azajya yinjiza miliyoni 178 z'amapawundi ku mwaka.
Gusa ibi bishobora kudakomeza muri Saudi Arabia, dore ko inkuru dukesha ikinyamakuru El Nacional ivuga ko Real Madrid yiteguye guha Ronaldo akazi ko kuba ambasaderi ariko adakina.
Iki kinyamakuru cyo muri Espagne kivuga ko Florentino Perez yijeje Cristiano Ronaldo ko atazigera abura akazi i Santiago Bernabeu, bikaba byitezwe ko rero ashobora kugaruka muri iyi kipe vuba n'ubwo atazaba aje gukina.
Perez arifuza kugarura Ronaldo i Madrid
Umufasha wa Cristiano Ronaldo, Georgina Rodriguez, nawe ngo yifuza kugaruka i Madrid aho yahuriye n'uyu mugabo we bwa mbere ubwo yari akiri muri Real Madrid.
Nta gushidikanya ko Ronaldo ari umunyabigwi wa Real Madrid dore ko yayitsindiye ibitego 451 mu mikino 438 yayikiniye, akaba ariwe mukinnyi wayitsindiye ibitego byinshi kuva yabaho.
Uyu mugabo yayifashije gutwara UEFA Champions League enye, Clubs World cup eshatu, UEFA Super cup, La liga ebyiri, n'ibindi bikombe.
Kuva yagera muri Al Nassr amaze kuyitsindira ibitego 12 muri shampiyona bagikomeje guhatanira.
Georgina Rodriguez nawe yifuza gusubira i Madrid(Net-photo)
