Nyuma yo gusoza umwaka w'imikino 2022/2023 itwaye Igikombe cy'amahoro ikaba izahagararira u Rwanda mu mikino ya CAF Confederation Cup, ikipe ya Rayon Sports ikomeje kwiyubaka.
Nyuma y'amazi y'abakinnyi akomeje kuvugwa muri iyi kipe, Rayon Sports yamaze gusinyisha umuzamu w'umugande witwa Simon Tamale wakiniraga ikipe ya Maroons FC iwabo muri Uganda.
Uyu mukinnyi usoje amasezerano muri iyi kipe ya Maroons FC, yayifashije kwitwara neza mu mwaka w'imikino ushize, aho yasoje ku mwanya wa gatandatu ku rutonde rwa shampiyona ifite amanota 41 ikaba yararushijwe amanota 12 na Vipers yatwaye igikombe.
Kwitwara neza muri uyu mwaka w'imikino byatumye Simon Tamale ashyirwa mu bakinnyi batatu bahataniye igihembo cy'umukinnyi w'umwaka muri shampiyona ya Uganda.
Biteganyijwe ko nyuma y'uyu muzamu, ikipe ya Rayon Sports irakomeza kwiyubaka kuko ishaka kugaruka muri shampiyona y'umwaka utaha ikomeye kurushaho, ndetse ikanagira icyo ikora muri Confederation Cup.
Simon Tamale yasinye muri Rayon Sports
