Shampiyona y'ikiciro cya kabiri mu bagore yari igeze ku munsi wayo wa kane kuri uyu wa Kabiri, ahakinwe imikino yo mu itsinda A riherereyemo APR WFC ndetse n'itsinda B riherereyemo Rayon Sports WFC.
Mu itsinda A abafana ba APR WFC bishimiye kubona ikipe yabo itsinda umukino wa mbere muri shampiyona aho yari imaze kunganya imikino itatu yose ibanza. APR WFC yatsinze Macuba WFC yari yakiriye uyu mukino, ibitego bitatu ku busa byatsinzwe na Zawadi watsinzemo bibiri ndetse na Emelyne agatsinda kimwe.
APR WFC yabonye intsinzi ya mbere
Ku rundi ruhande mu itsinda B ikipe ya Rayon Sports WFC yafashe Nyagatare WFC yayisuye mu Nzove iyitsinda ibitego 16-0. Muri ibi bitego Manizabayo Frolence yatsinzemo birindwi, Sifa atsindamo bitatu, Scolastique atsindamo bibiri mu gihe Dolice, Rosinne, Chance, na kapiteni Anderséne bagiye batsinda kimwe.
Ikipe ya Rayon Sports ikomeje kubabaza amakipe kuko imaze gutsinda ibitego 33 mu mikino itatu yonyine imaze gukina. Yatsinze Gatsibo WFC 16-0, itsinda Bridge WFC 0-1 yongeraho Nyagatare WFC yatsinze 16-0 ikaba inafite umukino w'ikirarane.
Rayon Sports WFC iri gukubita umuhisi n'umugenzi
