Umwaka w'imikino mu Rwanda urabura imikino ibiri yonyine ngo ushyirweho akadomo, iyo mikino ikaba ari imikino ya nyuma y'Igikombe cy'amahoro.
APR FC yamaze kwegukana Igikombe cya shampiyona 2022/2023 mu mpera z'icyumweru gishize, ubu igikurikira ni kumenya uwegukana Igikombe cy'amahoro.
Nyuma y'uko amatike yo kureba iyi mikino ya nyuma ashyizwe hanze mbere mu rwego rwo gukomeza kwitegura iyi mikino neza, amatike y'abantu 7,800 sitade ya Huye yakira ubu yose yamaze kugurwa.
Byari byatangajwe ko abashaka kwicara ahadatwikiriye bazishyura 2,000 Frw, 5,000 Frw ku hatwikiriye ndetse na 10,000 Frw muri VIP. Guaa ku muntu wari kugura itike ku munsi w'umukino yari kwishyura 3,000 Frw ahadatwikiriye, 7,000 Frw ahatwikire ndetse na 15,000 muri VIP.
Gusa ubu uwari ategereje kuzagura itike ku wa Gatandatu tariki 03 Kamena 2023 ntabwo azabasha kuyibona, kuko ubu amatike yose yamaze kugurwa agashira.
Kuri uyu munsi hazabanza umukino w'umwanya wa gatatu aho Mukura Victory Sports izaba ihanganye na Kiyovu Sports saa 12:00, naho ku isaha ya saa 15:00 APR FC ikazacakirana na Rayon Sports bahanganiye igikombe.
Amatike y'umukino wa nyuma w'Igikombe cy'amahoro yashize
