Ngendahimana Eric ni umwe mu bakinnyi bishimiwe cyane n'abafana ba Rayon Sports nyuma yo kubatsindira igitego kibaha intsinzi ku mukino wa nyuma w'Igikombe cy'amahoro, batsinda mukeba wabo APR FC.
Iki cyabaye igikombe cya 11 cy'amahoro iyi kipe itwaye, kikaba igikombe cy'amahoro cya mbere mu myaka irindwi ishize. Ni igikombe cya mbere kandi yegukanye iyobowe na Uwayezu jean Fidele mu myaka itatu amaze ayiyoboye.
Mbere y'uyu mukino y'uyu mukino inkuru zitari nziza zari nyinshi muri Rayon Sports, haba inkuru z'abakinnyi bigumuye kubera kudahembwa, ndetse n'inkuru y'irwana rya Osaluwe na Paul Were ubwo bari mu nzira berekeza i Huye.
Ibi byose byateraga impungenge abafana ba Rayon Sports kubera izo bombori bombori mu ikipe yabo, mu gihe APR FC yo yari ikomeje imyiteguro ituje.
Nyuma yo kwegukana iki gikombe, Uwayezu jean Fidele yaganiriye n'itangazamakuru agaruka ahanini ku bihe bitoroshye iyi kipe yanyuzemo ariko ikaba yabashije kwegukana igikombe.
Ati:"Birumvikana turishimye, kuko habayeho urugendo rurerure. Imyaka itatu nari mazemo, byari bigoye, ariko nagendaga nubaka nge na Komite.
"Umwaka wa mbere twabaye aba karindwi muri shampiyona. Umwaka wa kabiri tuba aba kane muri shampiyona, tuba aba gatatu mu gikombe cy'Amahoro. None umwaka wa gatatu tubaye aba gatatu. Ndishimye rero kuko abakinnyi barakoze, ubuyobozi bwarakoze, ndetse n'abafana muri rusange."
Yakomeje ati:"Twatangiye neza igikombe cy'Amahoro dutsinda, tutaragera muri ibyo bibazo.
"Ibibazo byabayeho kandi tubyitwaramo neza. Ntabwo ndi umubeshyi, abakinnyi nanjye nababwiye uko ibintu bimeze mbereka ko igikomeye ari ugutwara igikombe, none ubu turagitwaye. Igisigaye ni ugusozanya nabo kuva ku wa Mbere."
Kwegukana iki gikombe bivuze ko Rayon Sports igiye kongera gukina imikino nyafurika yaherukagamo mu 2020, n'ubwo iyo itsindwa nabwo yari kujyayo kuko ibikombe byombi byari kuba byatwawe na APR FC bityo hagasohoka uwakinnye umukino wa nyuma w'igikombe cy'amahoro.
Rayon Sports yegukanye igikombe cy'amahoro itari iherutse
