Myugariro Rugwiro Herve yatandukanye na AS Kigali

Myugariro Rugwiro Herve yatandukanye na AS Kigali

 Nov 23, 2022 - 10:54

Nyuma y'uko hari abibazaga niba uyu musore akiba muri AS Kigali kubera kutagaragara, iyi kipe yamaze kwemeza ko yatandukanye nawe.

Mu minsi ishize nibwo Rugwiro Herve yatangaje ko ari gukiruka imvune yagize mu itako yatumye amara amezi asaga arindwi adakina, aho yarimo yivuza mu bitaro CHUK ndetse akemeza ko yenda kugaruka mu kibuga.

Umwe mu bantu bo muri komite ya AS Kigali, yatangarije ISIMBI dukesha iyi nkuru ko bamaze gutandukana n’uyu myugariro wari ku mwaka we wa nyuma w’amasezerano bitewe n’uko bamubuze.

Ati:"twaratandukanye rwose. None se wowe wamara amezi 4 cyangwa 5 utabona umuntu ukaba ukimubara mu bakozi bawe? Ibaruwa rwose yarayihawe."

Ku kijyanye no kuba yaratereranywe ntavuzwe yavuze ko atari byo kuko n’abaganga b’ikipe bamushatse bakamubura.

Ati:"ibyo si byo ko muza ku kibuga uheruka kubona Rugwiro ryari? Niba arwaye nareke gukina aze ku kibuga, nareke kuza ku kibuga aze ku biryo by’ikipe rimwe na rimwe ariko umaze amezi 5 utagaragara ngo urarwaye ariko tukumva ngo wagiye mu mahugurwa y’ubutoza, iyi Kigali ni nto ntakiba ngo abantu bareke kukimenya.

"Abaganga bacu baramushatse baramubura ariko ngo twanze kumuvuza? Ibyo byose hari ibimenyetso. Twamaze gutandukana na we rwose."

Mu minsi ishize ubwo Casa Mbungo André yabazwaga kuri uyu mukinnyi yavuze ko nta cyo yamuvugaho kuko kuva yaza ataramubona mu kibuga ngo amutoze.

Casa yagize ati:"Wazamubajije, ubwo ntiwaba undenganyije kugira ngo ngusubize icyo kibazo? Wowe uzamubaze hanyuma noneho hari itsinda ry’abaganga uzaribaze ubwo uzikuriramo ukuri kwa we, Herve kuva naza waramubonye? Ubwo urumva nagusubiza iki?"

Uyu myugariro ukina mu mutima w’ubwugarizi aheruka mu kibuga tariki ya 1 Mata 2022 ku mukino wa shampiyona banganyijemo na Musanze FC 1-1 i Musanze.

Rugwiro Herve yatandukanye na AS Kigali