Lionel Messi yari inkingi ya mwamba ku ruhande rwa Argentine mu mukino wa nyuma w'Igikombe cy'isi ubwo iyi kipe yatsindaga u Bufaransa kuri penariti 4-2 nyuma yo kunganya ibitego 3-3 mu minota 90 na 30 yongeweho.
Byavugwaga ko uyu mugabo w'imyaka 35 ashobora guhita asezera mu ikipe y'Igihugu ya Argentine, ariko yamaze abanya-Argentine impungenge yemeza ko agihari mu ikipe y'igihugu.
Lionel Messi yabwiye TyC Sports ati:"Ntabwo ngiye gusezera mu ikipe y'igihugu ya Argentine. Nshaka gukomeza gukina nk'uwatwaye igikombe."
Lionel Messi yakomeje ati:"Twahangayitse ariko twagitwaye[Igikombe cy'isi].
"Nashakaga gusoza gukina umupira w'amaguru[career], nta kindi kintu nasaba, ndashima Imana, yampaye buri kimwe."
Messi afatiye runini ikipe y'igihugu ya Argentine muri iyi myaka(Net-photo)
Nyuma yo guterura igikombe kandi Lionel Messi yahamije ko yumva ari umunyamahirwe kubera ibyo yagezeho mu mupira w'amaguru.
Messi yagize ati:"Nabaye umunyamahirwe ku bw'ibintu byose nagezeho mu mupira w'amaguru...iki nicyo cyabiraga hano.
"Ni ubusazi.... reba ukuntu [Igikombe cy'isi] kimeze, ni kiza cyane.
"Nagishakaga cyane. Nari mfite ikerekezo cyo kuzabigeraho."
Irindi rushanwa kuri Lionel Messi mu ikipe y'igihugu ya Argentine ni Copa America yo mu 2024, aho iyi kipe izaba ishaka kwisubiza iki gikombe iheruka gutwara mu 2021.
Umutoza Lionel Scaloni utoza Argentine nawe mu magambo ye yemeje ko yifuza kubona Lionel Messi akomeza mu ikipe y'igihugu ya Argentine ati:"Messi akwiye kugira umwanya mu gikombe cy'isi gikurikira, dushaka ko akomeza.
"Niba ashaka gukomeza gukina, nimero 10 izahora iteguriye Lionel Messi."
Ikipe y'igihugu ya Argentine yegukanye Igikombe cy'isi nyuma y'imyaka 36 aho yaherukaga kucyegukana mu 1986 aho yari iyobowe na Diego Maradona, ubu ikaba igize ibikombe bitatu by'isi.
Argentine yegukanye Igikombe cy'isi yari inyotewe(Image:AP)
