Mu gihe habura imikino 20 muri shampiyona y'u Butariyani 2022-2023, Juventus yari ku mwanya wa gatatu irushwa amanota 10 na Napoli iri ku mwanya wa mbere, ariko ubu irisanga ku mwanya wa 10 nyuma yo gukurwaho amanota 15 izira kuba yarakoze amanyanga mu kugura no kugurisha abakinnyi.
Ibihano kandi ntibyagenewe ikipe ya Juventus gusa kuko n'abari bayiyoboyd mu gihe ibyo byakorwaga nabo bahanwe. Fabio Paratici kuri ubu ari mu ikipe ya Tottenham ariko muri icyo gihe yari diregiteri w'imikino muri Juventus, akaba yahanishijwe kumara amezi 30 atagaragara mu bikorwa bya ruhago.
Ibi bihano ntabwo bibuza Paratici kuba yakomeza akazi ko muri Tottenham dore ko ari hanze y'u Butariyani, ariko birashoboka ko FIFA na UEFA babyigaho naho agahagarikwa.
Muri Kanama nibwo byatangajwe ko iki kirego cyongeye gufungurwa, aho ubushinjacyaha bwashinjaga Juventus gutanga amakuru atariyo ku mafaranga iyi kipe yahombye hagati ya 2018 na 2020, by'umwihariko mu kugura no kugurisha abakinnyi.
Pavel Nedved wari umuyobozi w'iyi kipe nawe yahagaritswe amezi umunani adakandagira mu bikorwa bya ruhago, ndetse Agnelli na Maurizio Annivabene nabo bahagarikwa imyaka ibiri.
Juventus ikomeje kugira umwaka utari mwiza (Net-photo)
