Pep Guardiola yabaye umutoza wa kabiri muri shampiyona y'u Bwongereza ubashije gutwara Premier League, Champions League na FA Cup mu mwaka umwe, nyuma yo gutsinda Inter Milan ku mukino wa nyuma wa Champions League wabereye Instanbul.
Igitego kimwe cya Rodri cyari gihagije ngo Manchester City yegukane Champions League ya mbere mu mateka yayo, ndetse igakora amateka mu Bwongereza yakozwe na Manchester United mu 1999 yatozwaga na Sir Alex Ferguson.
Nyuma y'uyu mukino, Pep Guardiola yatangaje ko yakiriye ubutumwa bwa Ferguson mu gitondo ubwo yarimo yitegura Inter Milan.
Guardiola yavuze ko ubutumwa bwa Sir Alex bwamukoze ku mutima(Image:AFP)
Guardiola ati:"Ni iby'agaciro kuri nge kuba ndi impande ya Sir Alex Ferguson. Nakiriye ubutumwa bwe muri iki gitondo. Byankoze ku mutima. Byari byiza."
Guardiola yagize ibihe byiza mu Bwongereza kuva yaba umutoza wa Manchester City mu 2016, aho amaze gutwaramo ibikombe 12 harimo bitanu bya Premier League.
Ni ubwa kabiri Pep Guardiola atwara ibikombe bitatu bikomeye mu mwaka umwe, kuko mu 2009 ubwo yatozaga FC Barcelona yatwaye Champions League, La liga na Copa del Rey.
Uyu munya-Espagne yabaye umutoza wa mbere utwaye ibikombe bitatu bikomeye mu mwaka umwe, mu makipe abiri atandukanye.
Ni Champions League ya gatatu Pep Guardiola atwaye ari umutoza, akaba anganya na Zinedine Zidane, arushwa na Carlo Ancelotti gusa watwaye Champions League enye.
Guardiola akomeje gukora amateka(Net-photo)
