FC Barcelona yaraye yegukanye igikombe cya shampiyona ya La liga 2022/2023 nyuma yo gutsinda Espanyol ibitego 4-2, kikaba aricyo gikombe cya shampiyona yegukanye mu myaka ine ishize.
Ubwo umusifuzi yari asoje umukino, abakinnyi ba FC Barcelona n'umutoza wabo Xavi bahuriye hagati mu kibuga barafatana bishimira igikombe bari bamaze kwegukana ku kibuga cy'umukeba wabo baturanye.
Abafana b'ikipe ya Espanyol basazwe n'umujinya bahise birara mu kibuga bacika abashinzwe umutekano, bahita berekeza ku bakinnyi ba Barcelona aho bamwe bagaragaye babatera amacupa abandi babatera intebe.
Abakinnyi ba FC Barcelona nabo bakangaranye maze bahita biruka bagana mu rwambariro, ndetse umwe mu bagize staff y'iyi kipe yagaragaye yikubita hasi ubwo barimo biruka.
Nyuma y'umukino Xavi yagize ati:"Ni ibisanzwe kwishima ariko ndabyumva ko tutari mu rugo kandi ntidukwiye gusuzugura abandi."
Robert Lewandowski yatsinze ibitego bibiri, Alejandro Balde na Jules Kounde nabo baratsinda, bituma Barcelona ihita irusha Real Madrid amanota 14 mu gihe hasigaye imikino ine yonyine.
Umukino warangiye abakinnyi ba Barcelona bahurira hagati mu kibuga
Abafana ba Espanyol bahise bamanuka mu kibuga
Abakinnyi ba Barcelona bakijijwe n'amaguru
Barcelona yegukanye igikombe habura imikino ine
