Umukino ubanza wabaye ku wa kabiri w'icyumweru gishize, ikipe ya Rayon Sports yabashije gutsinda Bugesera FC igitego kimwe ku busa ariko abanyabugesera bataha bavuga ko bazabonana mu mukino wo kwishyura.
Umukino wo kwishyura wabereye mu karere ka Bugesera utangira ku manywa y'ihangu saa 15:00, dore ko hari abavuga ko mu byo bazize mu mukino ubanza harimo no gukinira ku matara nijoro.
Abakinnyi babanje mu kibuga ku mpande zombi
Bugesera FC:Nsabimana jean de Dieu, Mucyo Didier Junior, Ganijuru Elia, Muhinda Brian, Samuel David, Nkurunziza Seth, Hoziana Kennedy, Osaluwe Rafael, Munir Abdulahmann, Sadick Sulley na Chukwuma Odili.
Rayon Sports:Kwizera Olivier, Nizigiyimana Karim Mackenzie, Iranzi jean Claude, Niyigena Clement, Ndizeye Samuel, Mugisha Franscois Master, Nishimwe Blaise, Kwizera Pierrot, Muhire Kevin, Mussa Esenu na Willy Essomba Onana.
Rayon Sports yatangiye ihusha igitego ku munota wa gatandatu gusa ubwo Muhire Kevin yateraga umupira hejuru y'izamu arebana n'umuzamu, ku mupira mwiza yari ahawe na Ndizeye Samuel wari uhagaze mu ntera ndende.
Gusa kumunota wa 11 Mugisha Franscois yahaye umupira mwiza Onana nawe umupira awuhindura imbere y'izamu, Musa Esenu ahita atsinda igitego cya mbere cya Rayon Sports.
Ku munota wa 32 Willy Onana nawe yatsinze igitego cya kabiri cya Rayon Sports ku mupira wari uturutse kwa Nizigiyimana Karim Mackenzie, nawe wawakiriye awuhawe na Muhire Kevin.
Ibi bitego bibiri bya Rayon Sports nibyo byatumye iyi kipe ivana intsinzi i Bugesera, ndetse ihita ikomeza mu mikino ya 1/2 aho byitezwe ko izahura na APR FC.
Undi mukino wabaye kuri uyu munsi AS Kigali yanganyije na Gasogi United ubusa ku busa, ariko AS Kigali ikomez muri kimwe cya kabiri kuko yatsinze igitego kimwe ku busa mu mukino ubanza.
Muri kimwe cya kabiri Rayon Sports izahura na APR FC mu gihe yaba ikuyemo Marine FC, naho AS Kigali ihure na Police FC mu gihe yakuramo Etoile de l'Est.
Umukino wo kwishyura uzahuza APR FC na Marine FC, ndetse n'uzahuza Police FC na Etoile de l'Est yose iteganyijwe kuri uyu wa gatatu maze bikamenyekana koko niba ari APR FC na Police FC zilomeza dore ko zanatsinze imikino ibanza.
