Gianluigi Buffon yatangaje ko Juventus yatakaje umwimerere wayo kuva Cristiano Ronaldo yayigeramo ubwo uyu munyezamu yabazwaga impamvu uyu munya-Portugal atafashije iyi kipe gutwara Champions league.
Cristiano Ronaldo ufite imyaka 36 kuri ubu, yagiye mu ikipe ya Juventus mu 2018 ubwo yavaga muri Real Madrid yari amaze gutwaramo champions league zigera kuri enye ndetse n'ibindi bikombe.
Ronaldo wagiye agaragaza cyane ko ashobora irushanwa rya champions league, yari azanwe muri Juventus ngo azayifashe gutwara iki gikombe dore ko bari bamaze imyaka myinshi bagerageza ariko bagatsindirwa mu mikino ya nyuma.
Mu mwaka wa mbere wa Cristiano Ronaldo muri Juventus Buffon ntiyari ahari kuko yari muri PSG mu Bufaransa ariko mu 2019 yahise agaruka muri iyi kipe ya Juventus yakiniye imyaka myinshi.
Gianluigi Buffon aganira na TUDN.com yabajijwe impamvu iyi Juventus ya Cristiano Ronaldo itigeze igera ku gasongero ku mugabane w'Uburayi.
Buffon yagize ati:"Juventus yari ifite amahirwe yo gutwara champions league mu mwaka wa mbere ubwo yahageraga(Cristiano) ndi muri PSG ariko sinzi neza ikibazo yagize.
"Ubwo nagarukaga, nakoranye na Cristiano Ronaldo imyaka ibiri kandi twakoze neza turi kumwe, ariko Juventus yatakaje umwimerere wayo wo kuba ikipe.
"Twageze ku mukino wa nyuma mu 2017 kuko twari ikipe yuje abakinnyi bakuru ariko byongeyeho twari nk'umuntu umwe kandi abakinnyi bahanganiraga umwanya bigakomeza ikipe. Uwo mukino twatsinzwe na Ronaldo."
Cristiano Ronaldo aherutse kuva muri iyi kipe ya Juventus mu mpeshyi ishize agaruka mu ikipe ya Manchester United yaherukagamo mu 2009 ubwo yerekezaga muri Real Madrid yo muri Espagne.
Juventus ubu yicaye ku mwanya wa gatanu muri shampiyona ya Serie A aho irushwa amanota 12 na Inter.Milan iyoboye urutonde rw'agateganyo kuri ubu.
Nyuma yo kugarurwa k'umutoza Max Allegri, amakuru yagiye avugwa ko atifuzaga Cristiano Ronaldo mu ikipe ye mu rwego rwo kuzahura iyi kipe imaze iminsi mu bihe bibi.
Buffon na Cristiano mu ikipe ya Juventus(Image:Kiratas)
Cristiano Ronaldo ashinjwa kwica umwimerere wa Juventus(Image:Mint)
