Bukayo Saka arenda gushyira umukono ku masezerano maremare azatuma akuba kane umushahara yahembwaga muri Arsenal, akaba ari amasezerano agiye gusinya nyuma yo kuvugwaho kwifuzwa n'amakipe atandukanye.
Uyu musore yageze muri Arsenal akiri umwana muto kuko yahageze ku myaka irindwi gusa, akaba afite amasezerano azarangira mu mpeshyi ya 2024 bivuze ko asigaje amezi 15 gusa.
Saka amaze gutsinda ibitego 12 muri Premier League y'uyu mwaka ndetse ni umwe mu nkingi za mwamba Mikel Arteta ari kugenderaho muri uyu mwaka w'imikino, ikaba igiye kugaruka mu mikino ya UEFA Champions League yaherukagamo mu 2016.
Usibye kuba yaritwaye neza mu gikombe cy'isi atsindamo ibitego bitatu, muri rusange Bukayo Saka amaze gutsinda ibitego 13 ndetse anatanga imipira 10 yavuyemo ibitego, bikaba byarafashije cyane Arsenal cyane muri uyu mwaka w'imikino.
Saka asanzwe ahembwa ibihumbi 70 by'amapawundi ku cyumweru, ariko inkuru dukesha The Sun ivuga ko uyu musore agiye gusinya amasezerano azageza mu 2028 akazajya ahembwa ibihumbi 300 by'amapawundi ku cyumweru.
Uyu musore natangira guhembwa aya mafaranga azaba abaye umukinnyi wa mbere uhembwa menshi muri Arsenal, kuko azahita anyura kuri Gabriel Jesus uhembwa ibihumbi 250 by'amapawundi ku cyumweru.
Saka agiye kugirwa uhembwa agatubutse muri Arsenal(Image:Getty)
