Bobi Wine yatawe muri yombi-Videwo

Bobi Wine yatawe muri yombi-Videwo

N.Ildephonse N.Ildephonse  Oct 5, 2023 - 16:56

Umuhanzi Bobi Wine akaba n'umunyapolitike utavuga rumwe n'ubutegetsi bwa Uganda yatawe muri yombi akigera ku kibuga cy'indege ubwo yagarukaga mu gihugu.

Ku mbuga nkoranyambaga hakomeje gucicikana amashusho ya Robert Kyagulanyi Ssentamu uzwi mu muziki nka Bobi Wine ariko kandi akaba n'umunyapolitike utavuga rumwe n'ubutegetsi bwa Uganda ari gucakirwa n'inzego z'umutekano muri iki gihugu ubwo yari akigera ku kibuga cy'indege.

Bobi Wine akaba yafashwe kuri uyu wa Kane afatirwa ku kibuga mpuzamahanga cy'indege cya Entebbe, aho yari akubutse muri Canada no muri Afurika y'Epfo guhura n'abarwanashyaka be bo mu ishyaka rya National Unity Platform (NUP) nkuko biri kwandikwa na Daily monitor yaho muri Uganda.

Bobi Wine yafashwe n'inzego z'umutekano ubwo yari akigera ku kibuga cy'indege i Kampala

Umuvugizi wa Polisi mu mugi wa Kampala Patrick Onyango, akaba yatangaje ko atafashwe kugira ngo afungwe nkuko bitekerezwa, ahubwo ngo ni ukugira ngo polisi imuherekeze kugera iwe mu rugo. Ati "Nshaka kubamenyesha ko umuyobozi wa NUP abashizwe umutekano bamuherekeje kuva ku kibuga cy'indege cya Entebbe kugera iwe mu rugo Magere."

Yakomeje agira ati " Ndagira ngo nkureho ibihuha byavugaga ko ari poropaganda kumufata, ahubwo byari ukugira ngo ibikorwa by'ubucuruzi bikomeze kugenda neza ku muhanda uva ku kibuga cy'indege cya Entebbe ugana Kampala na Gayaza."

Nubwo polisi itangaza ibi, abo mu ishyaka rya NUP batangaje ko abayoboke babo barenga 300 batawe muri yombi kuri uyu wa Gatatu, mu gihe ngo urugo rwa Kyagulanyi rwashyizweho abashinzwe umutekano batabarika.

Bobi Wine umunyapolitike utavuga rumwe n'ubutegetysi bwa Uganda

Mu gushimangira ibi kandi, Barbie Itungo umugore wa Bobi Wine, yashyize hanze amavidewo yerekana urugo rwabo rugoswe n'abapolisi benshi ndetse hari na kajugujugu za gisirikare zica hejuru y'igisenge cy'inzu, aho yavugaga ko ari wenyine mu nzu we n'abana.

Ku munsi wo ku wa Gatatu kandi, Polisi yari yavuze ko abantu bari gutegura ibirori byo kwakira Kyagulanyi, ko binyuranyije n'amategeko babihagarika. Ndetse umuvugizi wa Polisi Onyango yari yavuze ko ibyo byahungabanya umutekano.