Kuri iki Cyumweru tariki 11 Kamena 2023 nibwo habaye Isiganwa ku maguru mpuzamahanga ryitiriwe amahoro, Kigali International Peace Marathon 2023 ryitabiriwe n'abantu 8,526 baturutse mu bihugu 48 biva ku migabane itandukanye.
Iri rushanwa ryakinwe ku nshuro ya 18 igizwe n'ibyiciro bitatu aribyo Full Marathon y’ibirometero 42.1, Half-Marathon y’ibirometero 21.09 na Run for Peace cyangwa Run for Fun yitabirwa n’abasiganwa bishimisha bakaba biruka intera y’ibirometero 10.
Umunya-Kenya George Onyacha niwe wabaye uwa mbere mu gice cya Full Marathon mu bagabo akoresheje amasaha abiri n'iminota 18, uyu akaba yari yabaye uwa gatatu mu mwaka ushize. Ni mu gihe kandi Muluhebt Stega ariwe wabaye uwa mbere mu bagore.
Onyacha yegukanye Full Marathon mu bagabo
Half-Marathon mu bagabo yegukanwe na Kennedy Kipyeko wakoresheje isaha imwe, iminota itatu n’amasegonda 52, akurikirwa na Mburu John wakoresheje isaha imwe, iminota itatu n’amasegonda 54 mu gihe Kipkorir Evans yakoresheje isaha imwe, iminota ine n’amasegonda 12.
Abanya-Kenya kandi bihariye imyanya ya mbere no mu bagore kuko uwa mbere yabaye Winfridah wakoresheje isaha imwe, iminota 12 n’amasegonda 40. Yakurikiwe na Lilian wakoresheje isaha, iminota 13 n’amasegonda 36 naho Susan akoresha isaha, iminota 14 n’amasegonda 33.
Mu banyarwandakazi abaje hafi ni Yankurije Marthe wabaye uwa karindwi akaba yakoresheje isaha imwe, iminota 15 n’amasegonda 40 naho Musabyeyezu Adeline wari watsinze iki cyiciro mu 2022, yabaye uwa 10 akoresheje isaha, iminota 16 n’amasegonda abiri.
Stega niwe wegukanye Full Marathon mu bagore
Kigali International Peace Marathon y'uyu mwaka yari ku rwego rwo hejuru nyuma y'uko amafaranga atangwa ku bihembo yongerewe, byatumye hanitabira abakinnyi bakomeye.
Umukinnyi wegukanye Marathon mu bagabo n’abagore yatsindiye ibihumbi 20 by'amadorali, uwa kabiri yahawe ibihumbi 15 by'amadorali naho uwa gatatu atwara 7,500 by'amadorali.
Mu basiganwe Igice cya Marathon kigizwe n'ibirometero 21,098, uwa mbere mu bagabo no mu bagore yatsindiye 5,000 by'amadorali, uwa kabiri ahabwa 4,000 by'amadorali, naho uwa gatatu ahabwa 3,000 by'amadorali. Muri ibi byiciro byose kandi harahembwa kuva ku wa mbere kugeza ku wa munani.
Umunya-Ethiopia Muluhebt Stega mu bagore niwe wegukanye #KigaliMarathon2023 pic.twitter.com/YWO4tj8fK8
— the choice_live (@thechoice_live) June 11, 2023
