Abaherwe ba Manchester United bayishyize ku isoko nyuma y'imyaka 17

Abaherwe ba Manchester United bayishyize ku isoko nyuma y'imyaka 17

 Nov 23, 2022 - 07:22

Glazer family imaranye Manchester United imyaka 17 yamaze kwemeza ko yiteguye kugurisha iyi kipe y'ubukombe mu Bwongereza.

Ikipe ya Manchester United yamaze gushyirwa ku isoko nk'uko abaherwe bayo bamaze kwemeza ko biteguye kwakira ubusabe bw'abashaka kuyigura.

Iyi kipe yavuzweho cyane kuri uyu wa Kabiri kubera gutandukana na Cristiano Ronaldo, andi makuru yaje kuzamukamo avuga ko abaherwe bayo baba bafashe umwanzuro wo kuyishyira ku isoko ubishoboye akaba yaguramo imigabane cyangwa akayigura yose.

Ibi byatangajwe na Glazer family nyirizina iyobowe na Avram Glazer ndetse na Joel Glazer basohoye itangazo ryemeza ko inzira zo kugurisha iyi kipe y'i Manchester bayitangiye.

Bivugwa ko aba banyamerika bifuza kugurisha Manchester United miliyari ikenda z'amapawundi byahita biyigira ikipe ya mbere ihenze ku isi, ikaza imbere ya Dallas Cowboys bivugwa ko ifite agaciro ka miliyari 7.3 z'amapawundi.

Byemejwe ko Manchester United iri kugurishwa (Net-photo)

Mu gihe Manchester United yaba igurishijwe byashyira akadomo ku rwicyekwe ruhora hagati y'abafana bayo na Glazer family, dore ko aba bafana badasiba kugaragaza ko batifuza aba banyamerika mu ikipe yabo.

Iyi kipe iheruka gutwara igikombe cya Premier League mu 2013 mu mwaka wa nyuma wa Sir Alex Ferguson, iheruka gutwara igikombe icyo aricyo cyose mu irushanwa mu 2013.

Bijyana n'izina iyi kipe ifite byitezwe ko bazayigurisha miliyari z'amapawundi zitari nkeya, bakaba bazakuramo inyungu iri hejuru dore ko bayiguze miliyoni 750 z'amapawundi mu 2005.

Ibi ababivuga babihuza n'ikipe ya Chelsea iherutse kugurwa miliyari 4.25 z'amapawundi igurwa n'umunyamerika Toddy Boehly, bikaba byitezwe ko rero Manchester United yo yaba iri hejuru mu gaciro.

Abafana ntibasiba kwibasira abaherwe b'ikipe yabo(Net-photo)